سۋ سالاسى ماماندارى قىتايدا بىلىكتىلىكتى ارتتىرۋ كۋرستارىنان ءوتۋدى باستادى
استانا. KAZINFORM - «جۇمىسشى ماماندىقتارىنىڭ جىلى» اياسىندا سۋ شارۋاشىلىعى سالاسىنا مامانداردىڭ جاڭا بۋىنىن دايارلاۋ باستالدى. بۇل تۋرالى ۇكىمەت ءمالىم ەتتى.
2025 -جىلعى 9-ساۋىردەن باستاپ مينيسترلىكتىڭ باستاماسىمەن قازاقستاندىق سۋ سالاسى ماماندارىنىڭ ءبىرىنشى توبى ق ح ر-دا بىلىكتىلىكتى ارتتىرۋ كۋرستارىنان ءوتۋدى باستادى. ءبىرىنشى توپقا 30 مامان كىردى. بۇدان ءارى قىتايدا 25 ادامنان تۇراتىن تاعى 3 توپ ءبىلىم الادى. جالپى كورشى ەلدە ەكى اپتالىق بىلىكتىلىكتى ارتتىرۋ كۋرستارىنان سۋ سالاسىنىڭ 105 مامانى وتەدى.
قازاقستاندىق ماماندار جوعارى وقۋ ورىندارىندا ەمەس، قىتاي حالىق رەسپۋبليكاسىنىڭ وندىرىستىك ۋچاسكەلەرى مەن نىساندارىندا «Power China» قىتاي كومپانياسىمەن قول قويىلعان مەموراندۋم شەڭبەرىندە بىلىكتىلىكتى ارتتىرۋ كۋرستارىنان وتەدى. كۋرستاردىڭ تاقىرىپتارى قاجەتتىلىكتەرگە سايكەس وتكىزىلەدى:
سۋ شارۋاشىلىعى وبەكتىلەرىن جوسپارلاۋ، سۋ تاسقىنىنىڭ الدىن الۋ جانە تابيعي اپاتتاردان بولاتىن زالالدى ازايتۋ بويىنشا؛
تابيعي اپاتتاردان كەيىن قالپىنا كەلتىرۋ جانە سۋ شارۋاشىلىعى وبەكتىلەرىن جوسپارلاۋ بويىنشا؛
سۋ رەسۋرستارىن يگەرۋ جانە پايدالانۋ جانە سۋدى باسقارۋ بويىنشا؛
سۋ رەسۋرستارىن باسقارۋ جانە اعىندى سۋلاردى تازارتۋ بويىنشا.
كۋرستاردان ءوتۋ كەزەڭىندەگى بارلىق شىعىن قىتاي تاراپىنىڭ ەسەبىنەن جابىلادى.
ۆەدومستۆونىڭ مالىمەتىنشە، ءاربىر وڭىردە سۋ شارۋاشىلىعى كوممۋنالدىق ۇيىمدارىن قۇرۋ، سونداي-اق سۋ شارۋاشىلىعى ۇيىمدارى قىزمەتكەرلەرىنىڭ الداعى 4-5 جىلدا زەينەتكە شىعۋى جونىندە ۇكىمەت قابىلداعان شەشىمدى ەسكەرە وتىرىپ، سۋ شارۋاشىلىعى ماماندارىنا قاجەتتىلىك 1,7 مىڭ ادام مولشەرىندە بولجانىپ وتىر.
وسىعان بايلانىستى سۋ شارۋاشىلىعى سالاسىنداعى كادرلار تاپشىلىعىن بولدىرماۋ ءۇشىن عىلىم جانە جوعارى ءبىلىم، سۋ رەسۋرستارى جانە يرريگاتسيا، سونداي-اق وقۋ-اعارتۋ مينيسترلىكتەرى سۋ سالاسى ءۇشىن كادرلار دايارلاۋ جونىندەگى 2024-2025 -جىلدارعا ارنالعان جول كارتاسىن قابىلدادى.
- جول كارتاسى سۋ سالاسىنىڭ ماماندارىنا ەڭبەك نارىعىنىڭ قاجەتتىلىكتەرىنە تالداۋ جۇرگىزۋدى كوزدەيتىن 28 ءىس-شارادان تۇرادى. قۇجاتتا ءبىلىم بەرۋ باعدارلامالارىن جاڭارتۋ، جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ ماتەريالدىق-تەحنيكالىق بازاسىن، سونداي- اق تەحنيكالىق جانە كاسىپتىك ءبىلىم بەرۋدى جاقسارتۋ كوزدەلگەن، - دەلىنگەن حابارلامادا.
بۇدان باسقا، قازاقستان رەسپۋبليكاسىنىڭ سۋ رەسۋرستارىن باسقارۋ جۇيەسىن دامىتۋدىڭ 2024-2030 -جىلدارعا ارنالعان تۇجىرىمداماسىنا سايكەس سۋ سالاسى ءۇشىن كادرلار دايارلاۋدى جاقسارتۋ ماقساتىندا ءبىلىم بەرۋدىڭ يننوۆاتسيالىق ادىستەرىن قولدانا وتىرىپ، جاڭا كاسىپتىك ستاندارتتار مەن ءبىلىم بەرۋ باعدارلامالارىن ازىرلەۋ قاراستىرىلعان.
سونداي-اق 2023 -جىلى مينيسترلىك جانىنان سۋ قورىن پايدالانۋ جانە قورعاۋ، سۋمەن جابدىقتاۋ، سۋ بۇرۋ جانە يرريگاتسيا سالاسىنداعى كاسىپتىك بىلىكتىلىك جونىندەگى سالالىق كەڭەس قۇرىلىپ، جۇمىس ىستەپ جاتىر. ونىڭ قۇرامىنا سۋ سالاسى ءۇشىن كادرلار دايارلاۋمەن اينالىساتىن ج و و مەن كوللەدجدەردىڭ پروفەسسورلارى مەن وقىتۋشىلارى كىردى.
2024 -جىلى سالالىق كەڭەس «گيدروتەحنيكالىق مەليوراتسيا» جانە «بوگەتتەر مەن دامبىلار قۇرىلىسى» ەكى كاسىبي ستاندارتىن، سونداي-اق «سۋ شارۋاشىلىعى» سالالىق بىلىكتىلىگىن وزەكتەندىرىپ، بەكىتتى.
سونداي-اق 2027 -جىلعا دەيىن سۋ سالاسىنىڭ كادرلارىن دايارلاۋ ساپاسىن ودان ءارى جاقسارتۋ ءۇشىن 9 جاڭا كاسىبي ستاندارتتاردى وزەكتەندىرۋ جانە ازىرلەۋ جوسپارلانۋدا.
جوعارىدا اتالعان ستاندارتتار نەگىزىندە جوعارى وقۋ ورىندارى مەن كوللەدجدەر جۇمىس بەرۋشىلەردىڭ قاجەتتىلىكتەرىن ەسكەرە وتىرىپ، وزدەرىنىڭ ءبىلىم بەرۋ باعدارلامالارىن جاڭارتادى.