ق ر سىرتقى ىستەر مينيسترلىگى باسپا ءسوز قىزمەتىنىڭ حابارلاۋىنشا، ءىس-شارا ۇلان-باتىر قالاسىندا ءوتىپ جاتقان ب ۇ ۇ- نىڭ شولەيتتەنۋگە قارسى كۇرەس جونىندەگى كونۆەنتسياسى تاراپتارىنىڭ 17-كونفەرەنسياسى (COP17) اياسىندا ءوتتى. تالقىلاۋعا ب ۇ ۇ، ۇلتتىق دەلەگاتسيالاردىڭ، ساراپشىلار قاۋىمداستىعىنىڭ جانە ۇكىمەتتىك ەمەس ۇيىمداردىڭ وكىلدەرى قاتىستى.
نەگىزگى نازار جەردىڭ توزۋى، قۇرعاقشىلىق، ازىق-تۇلىك قاۋىپسىزدىگى جانە بيوالۋانتۇرلىلىكتىڭ ساقتالۋى جاعدايىنداعى سۋ رەسۋرستارىن باسقارۋ ماسەلەلەرىنە اۋدارىلدى.
قازاقستان رەسپۋبليكاسىنىڭ موڭعولياداعى ەلشىسى الماس سەيتاقىنوۆ مەملەكەت باسشىسىنىڭ باستاماسى حالىقارالىق سۋ ىنتىماقتاستىعىن نىعايتۋ جانە قازاقستان، موڭعوليا مەن ورتالىق ازيا ءوڭىرى تاپ بولىپ وتىرعان ۇزاق مەرزىمدى ەكولوگيالىق پروبلەمالاردى شەشۋ تۇرعىسىنان ماڭىزدى ەكەنىن اتاپ ءوتتى. وسى رەتتە سۋ سالاسىنداعى وڭىرلىك ءوزارا ءىس-قيمىل تەتىكتەرىن جەتىلدىرۋ پەرسپەكتيۆالارى دا تالقىلاندى.
قازاقستاندىق دەلەگاتسيا حالىقارالىق سۋ ۇيىمىن قۇرۋدىڭ تۇجىرىمدامالىق تاسىلدەرىن جانە استانا، نايروبي مەن نيۋ-يورك قالالارىندا وتكىزىلگەن حالىقارالىق كونسۋلتاتسيالاردىڭ قورىتىندىلارىن تانىستىردى. قازاقستان تاراپى مۇددەلى مەملەكەتتەر مەن ۇيىمداردى سۋ رەسۋرستارىن جاھاندىق باسقارۋ جۇيەسىن ودان ءارى جەتىلدىرۋ ماسەلەلەرىن، ونىڭ ىشىندە ابۋ-دابيدە وتەتىن الداعى ب ۇ ۇ- نىڭ سۋ رەسۋرستارى جونىندەگى كونفەرەنسياسى اياسىندا تالقىلاۋعا شاقىردى.
قاتىسۋشىلار ب ۇ ۇ- داعى قازىرگى رەفورمالار جانە سۋ قاۋىپسىزدىگى سالاسىنداعى سىن-قاتەرلەردىڭ ارتۋى جاعدايىندا قازاقستان باستاماسىنىڭ وزەكتىلىگىن اتاپ ءوتتى. موڭعوليا سۋ اگەنتتىگىنىڭ ءتوراعاسى زەنەيامادارىن باتبايار قازاقستان باستاماسىنىڭ ۋاقتىلى كوتەرىلگەنىن اتاپ ءوتىپ، ەكولوگيالىق جانە كليماتتىق سىن-قاتەرلەردىڭ جاھاندىق سۋ پروبلەماتيكاسىمەن ءوزارا بايلانىسىنا نازار اۋداردى.
ءىس-شارا قورىتىندىسى بويىنشا قاتىسۋشىلار بۇۇ الاڭدارىندا سۋ كۇن ءتارتىبىن بىرلەسىپ ىلگەرىلەتۋگە جانە وسى سالاداعى كوپجاقتى ىنتىماقتاستىقتى نىعايتۋعا مۇددەلىلىك ءبىلدىردى.
وسىعان دەيىن و ا ەلدەرى سىرداريا باسسەينىندە سۋ ەسەبىن اۆتوماتتاندىرۋ جوسپارىنىڭ جوباسىن ازىرلەيتىنى تۋرالى جازدىق.