س ق و ديقاندارى استىق ساقتايتىن ەليەۆاتور تاپپاي قينالىپ جاتىر
پەتروپاۆل. KAZINFORM - سولتۇستىك قازاقستان وبلىسىندا ديقاندار جيناپ العان استىقتارىن ەليەۆاتورلارعا وتكىزە الماي جاتىر. سالدارىنان مول ءونىم قار مەن جاڭبىرعا ءتيىپ، شىري باستاعان.
س ق و ايىرتاۋ اۋدانى سۆەتلوە ەلدى مەكەنىنىڭ تۇرعىنى، جەكە كاسىپكەر الەۋمەتتىك جەلىدە جازبا جاريالاپ، پرەزيدەنتتەن كومەك سۇرادى.
ديقان اشىق اسپان استىندا بيىلعى استىق ءۇيىلىپ جاتقان قىرمانىن كورسەتىپ، جاعدايدى ايتىپ بەردى.
«انا جەردە بيداي جاتىر، ءارى قاراي ارپا ۇيىلگەن. وسىلايشا جينالعان استىقتى قىرماندا ساقتاۋعا تۋرا كەلىپ جاتىر. مۇنىڭ ءبارى ءبۇلىنىپ، ءشىرىپ جاتىر. ويتكەنى جاقىن ماڭداعى ەليەۆاتورلاردىڭ بارلىعى تولىق، بيدايدى قابىلداماي جاتىر. ولار ارتاتىن ۆاگوندار جوق دەيدى. بىلتىرعى جىل دا قيىن بولدى. جيناپ العان استىقتى بىلتىر دا دۇرىس ىسكە جاراتا المادىق. بيىل وقيعا قايتالانىپ جاتىر. ءسىز نەگە بۇل جۇيەلى تۇردە قايتالاناتىنىن انىقتاپ، تارتىپكە سالساڭىز ەكەن. بۇل جۇيەلى تۇردە جىلدان جىلعا قايتالاناتىن ماسەلە، شەشىلمەي جاتىر. كۇزگى وراق باستالعاندا بىزدەگى بار ۆاگوندار جوق بولىپ كەتەدى. ەليەۆاتورلار بىردەن تولىپ قالادى. جاقسى ءونىم العان جىلى ۇنەمى وسىلاي. ماسەلەنى شەشۋىڭىزدى سۇرايمىن»، - دەيدى كاسىپكەر.
ونىڭ ايتۋىنشا، جاعداي كۇردەلى. ويتكەنى كرەديتورلار دا جان- جاقتان قارىزدى قايتارۋدى سۇراپ جاتىر.
«كاماز كولىگىنىڭ جۇرگىزۋشىلەرى بيدايدى جاقىن ماڭداعى ەليەۆاتورعا جەتكىزۋ ءۇشىن ءار كەلىسىنە 5 تەڭگە سۇرايدى. دەلدالدار بيدايدى ەليەۆاتورعا كىرگىزۋ ءۇشىن ءار كەلىگە 10 تەڭگە الادى. بيدايدىڭ ءوز باعاسى - 40 تەڭگە. سونىڭ جارتىسىن ەليەۆاتورعا كىرگىزۋ ءۇشىن بەرۋ وتە قىمبات. سوندىقتان شارا قولدانىپ، جاعدايدى رەتتەۋدى سۇرايمىن»، - دەيدى اۋىل تۇرعىنى.
ەستەرىڭىزگە سالايىق، بيىل كۇزدە تولاسسىز جاۋىن ەگىن وراعىن قيىنداتتى.
سوندىقتان جاڭا استىقتى كەپتىرۋگە شارۋالارعا العاش رەت سۇيىتىلعان گاز ءبولىندى.