س ق و-دا ءىىس ءتيىپ ۋلانعان 8 بالانىڭ بەسەۋى جانساقتاۋ بولىمىندە جاتىر

پەتروپاۆل. KAZINFORM - سولتۇستىك قازاقستان وبلىسىندا كومىرتەگى توتىعىمەن ۋلانىپ قالعان ءبىر وتباسىنىڭ 8 بالاسى انالارىمەن بىرگە ايىرتاۋ اۋداندىق اۋرۋحاناسىندا ەم الىپ جاتىر.

س ق و دەنساۋلىق ساقتاۋ باسقارماسى باسپا ءسوز قىزمەتىنىڭ مالىمەتىنشە، بۇگىن اۋرۋحاناعا تۇسكەن 8 بالانىڭ ۇشەۋى بالالار بولىمشەسىنە ورنالاستىرىلدى، جاعدايلارى ورتاشا. قالعان بەس بالا قازىر جانساقتاۋ بولىمشەسىندە جاتىر، جاعدايلارى تۇراقتى، اۋىر.

«ايەل 1990 -جىلعى، اۋداندىق اۋرۋحانانىڭ تەراپيا بولىمشەسىنە ورنالاستىرىلدى. بالالاردىڭ ەڭ كىشىسى 2018 -جىلعى جانە ەگىز قىز 2012 -جىلى تۋعان. ەگىزدىڭ بىرەۋى دە جانساقتاۋ بولىمىنە ءتۇستى»، - دەيدى ۆەدومستۆونىڭ باسپا ءسوز حاتشىسى گۇلنار قاليەۆا.

ەسەرىڭىزگە سالايىق، بۇگىن ايىرتاۋ اۋدانى انتونوۆكا اۋىلىندا ءبىر ءۇيدىڭ 9 ادامى ءيىس ءتيىپ ۋلانعاندىعى جونىندە 112 تەلەفونىنا حابار ءتۇسىپ، ولاردىڭ ءبارى جەدەل تۇردە اۋداندىق اۋرۋحاناعا جەتكىزىلگەن ەدى.

الدىن الا بولجام بويىنشا، ايەل پەشتىڭ مۇرجاسىن ەرتە جاۋىپ تاستاعان.

اۆتور
اقەركە داۋرەنبەك قىزى