س ق و- دا ءۇش ادامدى ءولتىردى دەپ ايىپتالعان كۇدىكتىنى القابيلەر اقتاپ الدى

پەتروپاۆل. KAZINFORM - سولتۇستىك قازاقستان وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا القابيلەردىڭ قاتىسۋىمەن ءۇش ادامدى ءولتىردى جانە تونادى دەپ ايىپتالعان ك. -عا قاتىستى سوت ۇكىمى شىقتى.

س ق و سوتىنىڭ مالىمەتىنشە، ك. -گە مىنانداي ايىپ تاعىلعان:

2021 -جىلعى 5 -قاراشادا پەتروپاۆلدا پاتەرلەردىڭ بىرىندە تۋعان كۇندە بولىپ، م. دەگەننىڭ كۋرتكاسىنىڭ قالتاسىنان 20 مىڭ تەڭگە اقشاسى بار ءامياندى ۇرلاپ كەتكەن.

2023 -جىلدىڭ 5 -قىركۇيەگىندە ك. اناسىنىڭ ۇيىندە وزىمەن ازاماتتىق نەكەدە بىرگە تۇراتىن ك. ا. -مەن جانجالداسىپ، ونى ولتىرۋگە نيەتتەنەدى.

ايىپتاۋ قورىتىندىسى بويىنشا، ك. ايەلىنىڭ كىشكەنتاي قىزىن كوتەرىپ، ءوز بويىمەن بىردەي بيىكتىكتەن كىرەبەرىستىڭ ەدەنىنە الىپ ۇرعان. العان جاراقاتتارىنان بالا سول جەردە قايتىس بولدى. ءارى قاراي ايىپتالۋشى ايەلدىڭ قىلمىستىق جاۋاپكەرشىلىككە تارتامىن دەگەن قوقان-لوقىسىنان قورقىپ، ونى ءولتىرۋ ءۇشىن اۋزى-مۇرنىن جاۋىپ، تۇنشىقتىرعان. ەسىنەن تانىپ قالعان ك. ا. -نى ءولدى دەپ ويلاپ، قولىن بوساتقان.

بۇدان كەيىن ول وقيعاعا كۋاگەر كامەلەت جاسىنا تولماعان ءىنىسى س. -نى دا تۇنشىقتىرىپ ولتىرگەن.

ك. ءۇش ادامنىڭ ءولىمىن جازاتايىم وقيعا رەتىندە كورسەتىپ، ءوز قىلمىسىن جاسىرۋ ماقساتىندا، ا. ەس-ءتۇسسىز كۇيدە جاتقان كىرەبەرىس بولمەگە وت قويعان. سالدارىنان ايەل ءيىس ءتيىپ، ۋلانىپ، كوز جۇمدى.

ك. ءورتتىڭ وزدىگىنەن شىققانىن كورسەتۋ ءۇشىن ءۇيدىڭ تەرەزەسىن سىندىرىپ، سىرتقا شىعىپ، كومەككە شاقىرا باستاعان.

پروكۋرور قىلمىستىق قۇقىق بۇزۋشىلىقتاردىڭ جيىنتىعى بويىنشا ك. -عا ءومىر بويىنا باس بوستاندىعىنان ايىرۋ تۇرىندەگى جازا تاعايىنداۋدى سۇرادى.

قورعاۋشى تاراپ ك. -نى اقتاۋدى سۇرادى.

القابيلەر القاسىنىڭ ۇكىمىمەن ك. كىناسىز دەپ تانىلىپ، قىلمىس وقيعاسى بولمادى دەپ اقتالدى.

«ق ر قىلمىستىق كودەكسىنىڭ 191-بابىنىڭ 1-بولىگى - توناۋ، ق ر قىلمىستىق كودەكسىنىڭ 99-بابى 1، 3، 5-تارماقتارىنىڭ 2-بولىگى - ەكى نە ودان دا كوپ ادامدى ءولتىرۋ، كىنالى ادامعا دارمەنسىز كۇيدە ەكەنى كورىنەۋ بەلگىلى ادامدى، ايرىقشا قاتىگەزدىكپەن ءولتىرۋ جانە ق ر قىلمىستىق كودەكستىڭ 99-بابىنىڭ 3- ءبولىمى - جاس بالانى ءولتىرۋ بويىنشا ايىپتالعان ك. كىناسى دالەلدەنگەن جوق. ونىڭ ۇستىنەن قوزعالعان بارلىق ايىپ الىنىپ، سوت زالىنان بوساتىلسىن»، - دەدى س ق و قىلمىستىق ىستەر جونىندەگى مامانداندىرىلعان اۋدانارالىق سوتتتىڭ سۋدياسى داستان ىسمايلوۆ.

سونداي- اق ك. زاڭسىز قىلمىستىق جاۋاپكەرشىلىككە تارتىلعانى ءۇشىن كەلتىرىلگەن زياندى ءوندىرىپ الۋعا قۇقىلى دەپ تانىلدى.

ۇكىم زاڭدى كۇشىنە ەنگەن جوق.

اۆتور

اقەركە داۋرەنبەك قىزى