س ق و-دا بيىل 500 گە جۋىق ينتەرنەت الاياقتىق دەرەگى تىركەلگەن
پەتروپاۆل. KAZINFORM - سولتۇستىك قازاقستان وبلىسىندا جىل باسىنان بەرى ينتەرنەت الاياقتىق دەرەگى %11 ارتقان. قىلمىسكەرلەر قولداناتىن ايلا-امالداردىڭ ىشىندە بانك قىزمەتكەرى بولىپ قوڭىراۋ شالۋ ءالى دە الدىڭعى ورىندا كەلەدى.
س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، بيىل وبلىستا ينتەرنەت الاياقتىققا قاتىستى 453 قىلمىس تىركەلگەن. سونىڭ 205 جاعدايىندا الاياقتار تۇرعىندارعا «بانكتەن قوڭىراۋ شالىپ تۇرمىز» دەپ حابارلاسقان. ەكىنشى ورىندا بايلانىس وپەراتورى بولىپ حابارلاسۋ تۇر.
«ادامداردى الداپ، قۇرىققا ءتۇسىرۋ ءۇشىن قىلمىسكەرلەر تۇتاس سپەكتاكل ويناۋعا دەيىن بارادى. ماسەلەن، «سىزگە بايلانىس وپەراتورى قوڭىراۋ شالىپ وتىر. ءسىزدىڭ sim-كارتاڭىزدىڭ جارامدىلىق مەرزىمى اياقتالادى، ءسىز بۇل ءنومىردى ودان ءارى پايدالانۋدى جوسپارلاپ وتىرسىز با؟» دەپ اڭگىمە باستاپ، جەكە اقپاراتتى بىلۋگە تىرىسادى. قازىرگى ۋاقىتتا WhatsApp-تا اۋديو قوڭىراۋ ارقىلى دا ءجيى حابارلاساتىن بولعان»، - دەيدى س ق و پوليتسيا دەپارتامەنتى كريمينالدىق پوليتسيا باسقارماسىنىڭ باستىعى يۆان تەرزيدي.
بۇدان باسقا الاياقتار وزدەرىن قۇقىق قورعاۋ قۇرىلىمدارى مەن بانكتىك قاۋىپسىزدىك قىزمەتىنىڭ قىزمەتكەرلەرى رەتىندە تانىستىرىپ، ارام ويلارىن جۇزەگە اسىرماق بولادى. ماقسات - جۇرتتىڭ اتىنا ءىرى نەسيەلەر الىپ، قاراجاتتى وزدەرىنىڭ «قاۋىپسىز شوتتارعا» اۋدارىپ الۋ.
«سونداي-اق، ينتەرنەت ارقىلى ساۋدا-ساتتىق جاساعان كەزدە وتە اباي بولعان ءجون، الدىن الا تولەمگە كەلىسپەۋدى ۇسىنامىز. ەشبىر جاعدايدا بوتەن ادامدارعا قۇپيا دەرەكتەرىڭىزدى سەنىپ تاپسىرماڭىز، AnyDesk ،TeamViewer جانە باسقا دا بەيتانىس باعدارلامالاردى ورناتۋعا كەلىسپەڭىز»، - دەيدى يۆان تەرزيدي.
ينتەرنەت الاياقتىقتىڭ الدىن الۋ ماقساتىندا ءوڭىر پوليتسەيلەرى 13-15-تامىز ارالىعىندا «Anti-fraud» جەدەل الدىن الۋ ءىس-شاراسىن وتكىزىپ جاتىر. پوليتسەيلەر مەن جەرگىلىكتى بيلىك وكىلدەرى پەتروپاۆلداعى ساۋدا ويىن-ساۋىق ورتالىقتارىنىڭ بىرىندە انيماتوردىڭ قاتىسۋىمەن ينتەرنەت الاياقتىق ماسەلەسىنە جۇرتتىڭ نازارىن اۋداردى. ءتارتىپ ساقشىلارى اسىرەسە ەگدە جاستاعىلارعا ينتەرنەت-الاياقتىقتىڭ كەڭ تاراعان سحەمالارى تۋرالى جادنامالار تاراتىپ، اڭگىمەلەپ بەردى.
بۇعان دەيىن سقو- دا ەر ادام اۋىلداستارىن الداپ، 140 ميلليون تەڭگەنى قالتاسىنا باسقانىن جازعان ەدىك.
اۆتور
اقەركە داۋرەنبەك قىزى