س ق و-دا 56 جاستاعى جازاسىن وتەۋشى ايەل كولونيادا نەكەسىن قيدىردى

پەتروپاۆل. KAZINFORM - سولتۇستىك قازاقستان وبلىسىنداعى ايەلدەر كولونياسىندا جازاسىن وتەۋشى تۇرمىسقا شىعىپ، نەكەسىن قيدىردى. 56 جاستاعى ايەل تەك جەتى جىلدان كەيىن عانا بوستاندىققا شىقپاق.

پەتروپاۆلدىق ل. ەسىمدى ايەل وسىدان ءبىر جىل بۇرىن 8 جىلعا باس بوستاندىعىنان ايىرىلدى. ول دەنساۋلىققا قاساقانا اۋىر زيان كەلتىرگەنى ءۇشىن جازاسىن وتەپ جاتىر. قازىرگى ۋاقىتتا «ەڭبەك- قىزىلجار» كاسىپورنىندا ەڭبەك ەتەدى. ەندى 15 جىل ازاماتتىق نەكەدە تۇرعان بوستاندىقتاعى سۇيىكتىسىمەن نەكەسىن زاڭداستىردى.

«كۇيەۋىمنىڭ جاسى 52-دە. بۇرىننان تانىسپىز، ءبىراق، وكىنىشكە قاراي نەكەمىزدى بوستاندىقتا زاڭداستىرا المادىق. مەنىڭ ءبىرىنشى كۇيەۋىمنەن تۋعان ەكى قىزىمدى اياققا تۇرعىزۋعا كومەكتەستى، ءوز بالالارىنداي قارادى. قازىر قىزىمنىڭ 7 جاستاعى ۇلىن، جيەندى ءوسىرىپ جاتىر. ول ازىق-تۇلىك دۇكەندەرىنە تاۋار جەتكىزەدى. جەر ۇيدە تۇرادى، باقشا ۇستايدى. مەنى كۇتەمىن دەپ ايتتى»، - دەيدى جازاسىن وتەۋشى ل.

ەر ادام تەلەفون ارقىلى سۇيىكتىسىنە ۇسىنىس جاساعان.

«مەن، ارينە، ونىڭ زاڭدى جۇبايى بولۋعا كەلىستىم، مەكەمە اكىمشىلىگى مەنى قولداپ، نەكە قيۋ ءراسىمىن ۇيىمداستىردى. قازىر مەن وتە باقىتتىمىن، مەنى ۇيدە بالالارىم، نەمەرەلەرىم جانە كۇيەۋىم اسىعا كۇتىپ وتىر.

جاساعان قىلمىسىما قاتتى وكىنەمىن، ءبىراق ءومىر توقتاپ قالعان جوق، تۋىستارىم مەن جاقىندارىم مەنى كەشىرەدى دەپ ۇمىتتەنەمىن»، - دەيدى جازاسىن وتەۋشى.

س ق و بويىنشا قىلمىستىق اتقارۋ جۇيەسى دەپارتامەنتىنىڭ №50-مەكەمەسىندە قازىر 300 گە جۋىق ايەل جازاسىن وتەپ جاتىر. ولاردىڭ جارتىسىنان كوبىنىڭ وتباسى بار.

«ءبىز سوتتالعانداردىڭ وسىلايشا ءوز باقىتىن تاۋىپ، نەكەگە وتىرعانىن قۇپتايمىز. بۇل ولارعا بولاشاققا سەنىممەن قاراۋعا، دۇرىس جولعا ءتۇسىپ، تەزىرەك بوستاندىققا شىعۋعا ىنتالاندىرادى. ءارى شالىس باسىپ، ومىردەن تۇڭىلگەن باسقالارعا ۇلگى، ءار ادامعا ەكىنشى مۇمكىندىك بەرىلۋى ءتيىس»، - دەيدى مەكەمە قىزمەتكەرلەرى.

س ق و بويىنشا قىلمىستىق اتقارۋ جۇيەسى دەپارتامەنتى باسپا ءسوز قىزمەتىنىڭ مالىمەتىنشە، بىلتىر وڭىردە جازاسىن وتەۋشىلەردىڭ 14 ى، بيىل 13 ى كولونيادا نەكەسىن قيدىردى.

اۆتور
اقەركە داۋرەنبەك قىزى