سۋ باسقان وڭىرلەردە 16 مىڭ ادام ۇيىنە ورالدى

استانا. KAZINFORM - سۋ تاسقىنىنان كەيىن ادامدار ۇيلەرىنە ورالىپ جاتىر. سونداي-اق 6950 ادام، ونىڭ ىشىندە 3113 بالا ەۆاكۋاتسيالاۋ پۋنكتەرىندە قالىپ وتىر. بۇل تۋرالى توتەنشە جاعدايلار مينيسترلىگى ازاماتتىق قورعانىس جانە اسكەري بولىمدەر كوميتەتىنىڭ اعا وفيتسەرى ەراسىل سايپاش ءمالىم ەتتى.

«سۋ تاسقىنى تۋرالى بۇگىن ساعات 10:00-دەگى جاعداي، توتەنشە جاعدايلار مينيسترلىگىنىڭ اپاتتار مەديتسيناسى ورتالىعىنىڭ پسيحولوگتارى سۋ تاسقىنى قاۋپى بار وڭىرلەردىڭ تۇرعىندارىنا شۇعىل پسيحولوگيالىق جانە اقپاراتتىق تاۋلىك بويى كومەك كورسەتىپ جاتىر. جەدەل جەلى تەلەفونىنا 1857 قوڭىراۋ ءتۇستى. قازىرگى ۋاقىتتا 3709 تۇرعىن ءۇي مەن 2475 اۋلا اۋماعىنان اعىن سۋدىڭ باعىتى بۇرىلدى»، - دەدى ەراسىل سايپاش ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ت ج م وكىلىنىڭ مالىمەتىنشە، وسى ۋاقىتتا 16 مىڭ ادام ۇيلەرىنە ورالدى.

«6950 ادام، ونىڭ ىشىندە 3113 بالا ەۆاكۋاتسيالاۋ پۋنكتەرىندە. سونىمەن قاتار توتەنشە ايماقتاردان تۇرعىندار مەن مالدى قاۋىپسىز جەرگە كوشىرۋ جۇرگىزىلىپ جاتىر»، - دەيدى ول.

بۇعان دەيىن سۋ تاسقىنىنا بايلانىستى ەلىمىزدىڭ بەس وڭىرىندە 11 جول جابىق تۇرعانى تۋرالى حابارلاعان ەدىك.

اۆتور
داۋلەت ىزتىلەۋ