سۋ باسقان ءوڭىر تۇرعىندارىنا سالىق جەڭىلدىگى بولا ما

استانا. KAZINFORM - سۋ باسقان وڭىرلەردە سالىقتىق اكىمشىلەندىرۋ قالاي رەتتەلەدى؟ بۇل ساۋالعا قارجى مينيسترلىگىنىڭ مەملەكەتتىك كىرىستەر كوميتەتى ءتوراعاسىنىڭ ورىنباسارى سەيىلجان احمەتوۆ جاۋاپ بەردى.

«اكىمدىكتەر نازارىنا 2024-جىلعى 1-ناۋرىزدان باستاپ 30-ماۋسىمعا دەيىنگى وتەلۋى ءتيىس بارلىق سالىق جانە بيۋجەتكە تولەنەتىن باسقا دا مىندەتتى تولەمدەر، سونداي-اق الەۋمەتتىك تولەمدەردى كەيىنگە (2024-جىلعى 1-شىلدەگە دەيىن) قالدىرۋ ۇسىنىلدى. ەكىنشىدەن، 2024-جىلعى 1-ناۋرىزدان باستاپ 30-ماۋسىمعا دەيىنگى سالىق ەسەپتىلىگىن تاپسىرۋ مەرزىمى اۋىستى. ۇشىنشىدەن، مەرزىمىندە ورىندالماعان سالىق مىندەتتەمەسىنىڭ ورىندالۋىن قامتاماسىز ەتۋ جانە سالىق بەرەشەگىن ماجبۇرلەپ ءوندىرىپ الۋ شارالارىن قابىلداۋ توقتاتىلدى»، - دەدى سەيىلجان احمەتوۆ و ك ق- دە وتكەن باسپا ءسوز ءماسليحاتىندا.

كىرىستەر كوميتەتى وكىلىنىڭ ايتۋىنشا، ورىنداۋ مەرزىمى 2024-جىلعى 1-ناۋرىزدان باستاپ 30-ماۋسىمعا دەيىنگى كەزەڭدە باستالاتىن، كامەرالدىق باقىلاۋ ناتيجەلەرى بويىنشا مەملەكەتتىك كىرىستەر ورگاندارى انىقتاعان بۇزۋشىلىقتاردى جويۋ تۋرالى حابارلامانى ورىنداۋ مەرزىمى دە ۇزارتىلدى.

سونىمەن قاتار سالىقتىق تەكسەرۋلەردى (كەشەندى، تاقىرىپتىق، قارسى، حرونومەتراجدىق زەرتتەپ-قاراۋ) ۋاقىتشا توقتاتىلادى. بۇل رەتتە توقتاتا تۇرۋ مەرزىمى تەكسەرۋ مەرزىمىنە جانە تالاپ قويۋ مەرزىمىنە كىرمەيدى.

«جاڭا بۇيرىقتا سۋ تاسقىنىنان زارداپ شەككەن ادامدارعا قاتىستى جاڭادان سالىقتىق تەكسەرۋدى توقتاتا تۇرۋ جانە تاعايىنداۋ كوزدەلگەن. سول سياقتى مەرزىمىندە ورىندالماعان سالىق مىندەتتەمەلەرى بويىنشا 2024-جىلعى 1-ناۋرىزدان باستاپ 2024-جىلعى 1-شىلدەگە دەيىن ءوسىمپۇل ەسەپتەمەۋ كوزدەلگەن»، - دەيدى سپيكەر.

بۇيرىق رەسمي جاريالانعان كۇنى قولدانىسقا ەنگىزىلەدى جانە 2024-جىلعى 1-ناۋرىزدان باستاپ تۋىنداعان قۇقىقتىق قاتىناستارعا قولدانىلادى.