سۋ باسقان ايماقتاردا تاۋلىك بويى قىزمەت اتقارامىز - قىزىلوردالىق قۇتقارۋشى

قىزىلوردا. KAZINFORM - قىزىلوردالىق قۇتقارۋشى ادىلەت وراز ەلىمىزدىڭ سۋ باسقان ايماقتارىندا قىزمەتىن اتقارىپ ءجۇر. ءاربىر كۇنى ءوز جۇمىسىن قالتقىسىز اتقارىپ، تابيعي اپات سالدارىن جويۋعا بەلسەنە اتسالىسىپ كەلەدى.

سوڭعى ءبىر ايدىڭ ىشىندە قىزىلوردالىق جاس قۇتقارۋشى ارىپتەستەرىمەن بىرگە ۋاقىتپەن ساناسپاي ەڭبەك ەتتى. وسىنىڭ ارقاسىندا قانشاما شىعىننىڭ الدىن الىپ، تالاي ادامنىڭ ءومىرىن ساقتاۋعا قول ۇشىن سوزدى.

«تابيعي اپات ەلگە كوپتەگەن شىعىن الىپ كەلدى. وقيعانىڭ بەل ورتاسىندا جۇرەمىز. كوزبەن كورگەندى سوزبەن ايتىپ جەتكىزۋ وڭايعا سوقپاس. ەلەستەتىپ كورىڭىزشى، توتەننەن تونگەن قارعىن سۋ بىرنەشە ءجۇز باس جىلقى مەن سيىردى جاڭقاداي اعىزىپ اكەتىپ بارادى. ەكپىنى تراكتوردى دا قالقىتادى. ەندى ءبىرىنىڭ باسپاناسىن بەل ورتاسىنا دەيىن سۋ باسىپ تۇر. تاسقىننان قورعانىپ كەش باتقانشا شاتىر توبەسىندە وتىرىپ جان باققان تۇرعىندار اۋەدەگى تىكۇشاققا جانۇشىرا قول سوزادى. ولاردىڭ بارلىعىنا ءبىر مەزەتتە كومەك كورسەتۋ مۇمكىن ەمەس. كەزەڭ كەزەڭىمەن ءار قايسىسىمىزدى ءار تاراپقا اۋىلعا ءبولىپ مۇمكىندىگىنشە جەدەل ارەكەت ەتىپ دىلگىر جانعا قول سوزۋعا اسىقتىق. العاشىندا 24 ساعات ءۇزىلىسسىز كومەك كورسەتتىك. حالقىمىزدا «جۇمىلا كوتەرگەن جۇك جەڭىل» دەگەن ءسوز بار. قازىر احۋال بۇرىنعىدان رەتتەلىپ كەلەدى. دەگەنمەن قاۋىپ ءالى سەيىلگەن جوق. بۇل ماقساتتا اتىراۋ وڭىرىندە قىزمەت اتقارىپ ءجۇرمىز. ۋاقىتپەن ساناسپاي ەل قاۋىپسىزدىگى ءۇشىن ەڭبەك ەتىپ جاتقان ارىپتەستەرىمنىڭ ەسەلى ەڭبەگىن جوعارى باعالايمىن. باستىسى، ەلىمىز امان، جۇرتىمىز تىنىش بولسىن»، - دەدى ادىلەت وراز.

جاس قۇتقارۋشى 1 ايعا جۋىق ۋاقىتتان بەرى تاسقىن سۋدى سەيىلتۋ ماقساتىندا جۇمىس جاساپ كەلەدى. ونى ادىلەتتى ەلدە اناسى، باۋىرلارى، جان-جارى اسىعا كۇتۋدە.

فوتو: قىزىلوردا وبلىستىق ت ج د

ادىلەت وراز ءتورت جىلدان بەرى قىزىلوردا وبلىسى توتەنشە جاعدايلار دەپارتامەنتى «جەدەل قۇتقارۋ جاساعىندا» قۇتقارۋشى بولىپ ەڭبەك ەتىپ كەلەدى. ول ءوزىن باسقا سالادا ەلەستەتە المايتىنىن ايتادى. ويتكەنى ادىلەت ءۇشىن ونىڭ جۇمىسى - ءومىرىنىڭ ءمانى.

«بالا كۇنىمنەن قوعامعا قاجەتتى مامان يەسى بولۋدى جانە ادال قىزمەت ەتۋدى، ارماندادىم. وسىلايشا ارمانىم مەنى قۇتقارۋشى قىزمەتىنە اكەلدى. قىزمەتكە العاش كەلگەن ۋاقىتتا كوڭىلىمدە ۇلكەن قورقىنىش بولدى. سەنىمدى اقتاي الامىن با ، ناعىز قۇتقارۋشى بولۋ ءۇشىن نەنى قاپەرگە الۋ قاجەت سىندى سان ساۋال سانامدا تۇردى. دەگەنمەن بالا ارمانىم بۇگىندە مەنىڭ ومىرلىك قىزمەتىمە اينالدى. ونى ۇلكەن جەتىستىك دەپ باعالايمىن. اعا بۋىننان كوپ نارسە ۇيرەنىپ، مول تاجىريبە جيناقتاپ كەلەمىن. قۇتقارۋشىلىق جۇمىستى باستاعان العاشقى ۋاقىتتا اتا-انام الاڭداپ، جانىن شۇبەرەككە ءتۇيىپ وتىراتىن. ءبىراق ءبىزدىڭ جۇمىسىمىزدا كۇن سايىن تاجىريبە جيناقتاۋ وتە ماڭىزدى. كەيدە سۋعا كەتكەن ادامداردى تەرەڭنەن ىزدەپ جاتامىز. مۇندايدا وزەن-كولدىڭ استىنا جينالعان ءتۇرلى قالدىق تا كەدەرگى بولادى. ونىڭ بارلىعىنا ەپتىلىك كەرەك. كۇندەلىكتى جۇمىس ونىڭ بارىنە ۇيرەتەدى»، - دەيدى ول.

كەيىپكەرىمىزدىڭ ايتۋىنشا، قۇتقارۋشى بولۋ ءۇشىن تەز شەشىم قابىلداپ قانا قويماي، ءوز ىسىنە جاۋاپ بەرە الاتىن ادام بولۋىڭىز ماڭىزدى. سەبەبى سۇڭگۋىر بولۋ ەپتىلىكتى، ۇلكەن جاۋاپكەرشىلىكتى قاجەت ەتەدى.

«سۇڭگۋىردىڭ جۇمىسى ۋاقىتتى، مەزگىلدى تاڭدامايدى. تاڭەرتەڭ نەمەسە كەش، قىس نەمەسە جاز دەگەن انىقتامالار ءبىز ءۇشىن جوق. قاي ۋاقىتتا سۋعا ءتۇسۋ كەرەك بولسا، سول ۋاقىتتا سۋعا تۇسەمىز. ءبىزدىڭ جۇمىس ۋاقىتىمىز ساعاتپەن ولشەنبەيدى. جانە سۋ قاتەلىكتى كەشىرمەيدى. سوندىقتان سۇڭگۋىرگە ەڭ كەرەگى - ستراتەگيا. ءتورت جىلدىڭ ىشىندە ءتۇرلى ىزدەستىرۋ- قۇتقارۋ جۇمىستارىنا بەلسەنە قاتىستىم. مەن قازىرگى ءومىرىمدى وزگە سالادا مۇلدە ەلەستەتە دە المايمىن»، - دەيدى ادىلەت.

اۆتور
ءادىلجان ۇمبەت