كەلىسسوز اياسىندا مەملەكەت باسشىسى يوردانيا كورولى II ابداللا بەن ءال-حۋسەيننىڭ قازاقستانعا رەسمي ساپارى ەلدەرىمىز اراسىنداعى بەرىك دوستىقتى، ءوزارا قۇرمەت پەن ىنتىماقتاستىقتى كورسەتەتىنىن اتاپ ءوتتى.
- يوردانيا - اراب الەمىندەگى ۋاقىت تەزىنەن وتكەن سەنىمدى سەرىكتەسىمىز. كەيىنگى جىلدارى ىقپالداستىعىمىز قارقىن الا باستادى. ءبىز ارامىزدا ورناعان ءتۇرلى دەڭگەيدەگى بەرىك ساياسي ديالوگتى جوعارى باعالايمىز. بىلتىر ەكىجاقتى قارىم-قاتىناس ءۇشىن ەرەكشە كەزەڭ بولدى، ءبىر-بىرىمىزگە ساپارمەن باردىق. كەلىسسوزدەر قورىتىندىسى بويىنشا بىرلەسكەن مالىمدەمە قابىلداندى، سونداي-اق مينيسترلىكتەرىمىز بەن ۆەدومستۆولارىمىزدىڭ جانە ىسكەرلىك ورتا وكىلدەرىنىڭ اراسىندا كوپتەگەن قۇجاتقا قول قويىلدى. مۇنىڭ ءبارى كوپجاقتى ىنتىماقتاستىعىمىزدى ودان ءارى ىلگەرىلەتۋگە سەپتىگىن تيگىزدى، - دەدى پرەزيدەنت.
قاسىم-جومارت توقايەۆ قازاقستان ءوزارا مۇددەگە ساي بارلىق سالادا قول جەتكىزىلگەن ۋاعدالاستىقتاردى ناقتى ىسكە اسىرۋعا باسا ءمان بەرەتىنىنە توقتالدى.
ەكونوميكالىق ىقپالداستىق قازاق- يوردان قارىم-قاتىناسىنىڭ نەگىزگى قوزعاۋشى كۇشى بولىپ قالا بەرەدى.
سونىمەن قاتار اكادەميالىق جانە عىلىمي بايلانىستاردى نىعايتۋ، ءوزارا تۋريستەر اعىنىن ارتتىرۋ ارقىلى مادەني- گۋمانيتارلىق ىنتىماقتاستىقتى كەڭەيتۋدىڭ الەۋەتى زور.
ايتا كەتەيىك، پرەزيدەنت قاسىم-جومارت توقايەۆتىڭ شاقىرۋىمەن قازاقستانعا يوردان حاشيميت كورولدىگىنىڭ كورولى II ابداللا بەن ءال-حۋسەين رەسمي ساپارمەن كەلدى. استانا اۋەجايىندا يوردانيا كورولىن مەملەكەت باسشىسىنىڭ ءوزى كۇتىپ الدى.
سونىمەن بىرگە يوردانيا كورولى 6-قاراشا كۇنى استانادا وتەتىن اقابا پروتسەسى سامميتىنە قاتىسادى. بۇل جيىنعا ءبىرقاتار مەملەكەتتىڭ باسشىلارى كەلمەك.