قۇجاتتارعا قول قويۋ راسىمىنە ەكى ەلدىڭ مەملەكەت باسشىلارى — قازاقستان پرەزيدەنتى قاسىم-جومارت توقايەۆ پەن تاجىكستان پرەزيدەنتى ەمومالي راحمون قاتىستى.
پرەزيدەنت تەلەراديوكەشەنى تاجىكستان ۇكىمەتى جانىنداعى تەلەديدار جانە راديو كوميتەتىمەن، «سافينا» تەلەارناسىمەن جانە «دجاحوننامو» تەلەارناسىمەن ءوزارا تۇسىنىستىك پەن ىنتىماقتاستىق تۋرالى مەموراندۋمدار ورناتتى.
قۇجاتتارعا ق ر پرەزيدەنتى تەلەراديوكەشەنىنىڭ ديرەكتورى راۋشان قاجىبايەۆا مەن تاجىكستان ۇكىمەتى جانىنداعى تەلەديدار جانە راديو كوميتەتىنىڭ ءتوراعاسى نوسير سايدزودا قول قويدى.
بۇل ۋاعدالاستىقتار كاسىبي بايلانىستى دامىتۋعا، اقپارات سالاسىنداعى ارىپتەستىكتى نىعايتۋعا، تەليەۆيزيا جانە راديو باعىتىنداعى ىنتىماقتاستىقتى كەڭەيتۋگە، سونداي-اق رەداكسيالار مەن شىعارماشىلىق ۇجىمدار اراسىنداعى ءوزارا ءىس-قيمىلعا جول اشۋعا باعىتتالعان.
پرەزيدەنت تەلەراديوكەشەنىنىڭ ديرەكتورى راۋشان قاجىبايەۆا ىنتىماقتاستىقتىڭ باستى ماقساتى — قازاقستاندىق جانە تاجىكستاندىق مەدياماماندار اراسىنداعى بايلانىستى دامىتۋ، سونداي-اق قازاقستان مەن تاجىكستاننىڭ مادەني-گۋمانيتارلىق قارىم-قاتىناستارىن نىعايتۋ ەكەنىن اتاپ ءوتتى.
تاجىكستان ۇكىمەتى جانىنداعى تەلەديدار جانە راديو كوميتەتىنىڭ ءتوراعاسى نوسير سايدزودانىڭ ايتۋىنشا، قول قويىلعان قۇجاتتار قازاقستاندىق ارىپتەستەرمەن ۇزاقمەرزىمدى سەرىكتەستىك ورناتۋعا مۇمكىندىك بەرەدى.
— كاسىبي تاجىريبە الماسۋ مەن حالىقتارىمىزدىڭ ءبىر-ءبىرىن، مادەنيەتى مەن ءداستۇرىن تەرەڭىرەك تانىپ-بىلۋىنە ىقپال ەتەتىن ماتەريالدار ازىرلەۋ باعىتىندا ۇلكەن الەۋەت بار دەپ سانايمىز، — دەدى ول.
تاراپتار كاسىبي بايلانىستى مەملەكەتتىك بەيىندى ورگاننان باستاپ ۇلتتىق تەلە-راديوارنالارعا دەيىنگى بىرنەشە دەڭگەيدە دامىتۋدىڭ ماڭىزىن اتاپ ءوتتى. ءۇش مەموراندۋمعا قول قويىلۋى قازاقستان مەن تاجىكستاننىڭ بۇقارالىق اقپارات قۇرالدارى سالاسىنداعى ىنتىماقتاستىعىن نىعايتۋ جولىنداعى كەزەكتى قادام بولدى.
ق ر پرەزيدەنتىنىڭ تەلەراديوكەشەنى — مەملەكەت باسشىسىنىڭ قىزمەتىن اقپاراتتىق تۇرعىدا سۇيەمەلدەيتىن مەديارەسۋرس. مەدياحولدينگ قۇرامىنا Jibek Joly تەلەارناسى، دەرەكتى كينو ورتالىعى، Jibek Joly راديوستانسياسى جانە ەلىمىزدەگى ەڭ تاريحي اقپارات اگەنتتىگى — Kazinform ح ا ا كىرەدى. اقپارات اگەنتتىگى قازاق، ورىس، وزبەك، اعىلشىن، قىتاي تىلدەرىندە جانە توتە جازۋمەن اقپارات تاراتادى.
تاجىكستان رەسپۋبليكاسى ۇكىمەتى جانىنداعى تەلەديدار جانە راديو كوميتەتى - ەلدەگى مەملەكەتتىك تەلەراديو حابارلارىن تاراتۋ جانە كينەماتوگرافيا سالاسىنا باسشىلىق جاساپ، ونىڭ جۇمىسىن رەتتەيتىن ۇكىمەتتىڭ نەگىزگى ۋاكىلەتتى ورگانى.
«دجاحوننامو» - تاجىكستانداعى تاۋلىك بويى حابار تاراتاتىن جالعىز مەملەكەتتىك اقپاراتتىق تەلەارنا. ارنا جەدەل جاڭالىقتار مەن ساراپتامالىق ماتەريالدارعا باسىمدىق بەرەدى. ونىڭ رەسپۋبليكا ىشىندە دە، شەتەلدە دە تىلشىلەر جەلىسى قالىپتاسقان.
«سافينا» - مادەني-اعارتۋشىلىق جانە الەۋمەتتىك- ەكونوميكالىق باعىتتاعى جەتەكشى مەملەكەتتىك تەلەارنا. دۋشانبەدە زاماناۋي سيفرلىق ستۋديا كەشەنى بار. تەلەارنا تاجىك جانە ورىس تىلدەرىندە حابار تاراتادى.
ايتا كەتەيىك، اقوردادا قازاقستان مەن تاجىكستاننىڭ رەسمي دەلەگاتسيالارى ۇكىمەتارالىق جانە ۆەدومستۆوارالىق دەڭگەيدە 14 قۇجاتقا قول قويدى.
5-7 -قاراشا كۇندەرى مەملەكەت باسشىسىنىڭ شاقىرۋىمەن ەلىمىزگە تاجىكستان پرەزيدەنتى ەمومالي راحموننىڭ رەسمي ساپارى ءوتىپ جاتىر.
اۆتورلار
ايجان سەرىكجان قىزى