قاسىم-جومارت توقايەۆ جيىنعا قاتىسۋشىلارمەن گەرمانيا قارجىسىن، تاجىريبەسى مەن تاۋەكەلدى باسقارۋ تەتىكتەرىن قازاقستاننىڭ رەسۋرسىمەن جانە كولىك سالاسىنداعى مۇمكىندىكتەرىمەن ۇشتاستىرۋ ماسەلەسىن تالقىلادى.
پرەزيدەنت ەلىمىز گەرمانيانىڭ ورتالىق ازياداعى جانە ەۋرازيا كەڭىستىگىندەگى سەنىمدى سەرىكتەسى بولۋعا ۇمتىلاتىنىن مالىمدەدى.
- حالقىمىز گەرمانياعا ايرىقشا قۇرمەتپەن قارايتىنىن، ابىروي-بەدەلى جوعارى مەملەكەت دەپ بىلەتىنىن اتاپ ايتقىم كەلەدى. بانك سەكتورىنداعى تەمىردەي تارتىپكە، ينجەنەرلىك شەشىمدەردىڭ جوعارى ساپاسىنا، شاعىن جانە ورتا بيزنەستىڭ ورنىقتىلىعىنا (Mittelstand) ءتانتىمىز. ەكونوميكامىزدى جاڭعىرتۋ مەن تەحنولوگيالىق تۇرعىدان ترانسفورماتسيالاۋ ۇدەرىسىندە ءدال وسى ەرەكشەلىكتەردى ۇلگى تۇتامىز. گ ف ر - ەۋروپاداعى باستى سەرىكتەستەرىمىزدىڭ ءبىرى. ەلىمىزدىڭ ەڭ ءىرى ساۋدا- ينۆەستيتسيالىق سەرىكتەسى - ەۋروپالىق وداقپەن ىقپالداستىقتا قازاق-گەرمان ىنتىماقتاستىعىنىڭ ماڭىزى زور. ءبىز ۇلكەن جولدى ەڭسەردىك. ايتسە دە ەكونوميكالىق بايلانىسىمىزدىڭ الەۋەتى مۇنىمەن تۇگەسىلمەيدى. قازاقستان ونى جاڭا ساپالى دەڭگەيگە كوتەرۋگە دايىن،- دەدى مەملەكەت باسشىسى.
پرەزيدەنت كەزدەسۋگە قاتىسۋشىلارعا جاقىندا SP اگەنتتىگى قازاقستاننىڭ دەربەس رەيتينگىن «تۇراقتى» دەگەن بولجاممەن BBB دەڭگەيىنە كوتەرگەنىن جەتكىزدى. Fitch اگەنتتىگى دە وسىنداي باعا بەردى.
مەملەكەت باسشىسى سوڭعى ون جىلدا ەلىمىز وڭىردەگى ەڭ وزىق سيفرلىق جانە قارجىلىق ەكوجۇيەنى قۇرعانىنا نازار اۋداردى.
- ەكونوميكامىزدى قارجىلاندىرۋعا دامۋ ينستيتۋتتارى بەلسەندى اتسالىسۋدا. وتكەن جىلى ولار 20 ميلليارد دوللار كولەمىندە قاراجات ءبولدى. قازاقستان دامۋ بانكى ۇزاق جىلدار بويى نەمىس قارجى ينستيتۋتتارىنىڭ قولداۋىمەن ونەركاسىپ، ەنەرگەتيكا، كولىك ينفراقۇرىلىمى سالالارىندا ماڭىزدى جوبالاردى ىسكە اسىرىپ كەلەدى. بۇل ماقساتقا Deutsche Bank, Helaba, LBBW، Commerzbank, KfW جانە باسقا دا ۇيىمداردان 1,2 ميلليارد دوللار قارجى تارتىلدى،- دەدى مەملەكەت باسشىسى.
وسىعان دەيىن «Handelsblatt» نەمىس ىسكەرلىك باسىلىمىندا ق ر پرەزيدەنتى قاسىم-جومارت توقايەۆتىڭ ماقالاسى جاريالاندى. وندا قازاقستان ەۋروپا ەكونوميكاسىندا ستراتەگيالىق مانگە يە 34 شيكىزات ءتۇرىنىڭ 21 ءىن وندىرەتىنى جازىلعان. سونداي-اق ءوز ماقالاسىندا قازاقستان پرەزيدەنتى بەرلينگە قوسىلعان قۇنى جوعارى ونىمدەر شىعاراتىن ءوندىرىس تىزبەگىن بىرگە قالىپتاستىرۋدى ۇسىنادى.