بۇل تۋرالى پارلامەنت پالاتالارىنىڭ وتىرىسىندا اتالعان قۇجاتتى تالقىلاۋ بارىسىندا ءماجىلىس دەپۋتاتى جاناربەك ءاشىمجان ايتتى.
- كونستيتۋتسيالىق زاڭنىڭ جوباسى قازاقستان رەسپۋبليكاسىنىڭ كونستيتۋتسياسىنا سايكەس قازاقستان رەسپۋبليكاسى پرەزيدەنتىنىڭ جانە قازاقستان رەسپۋبليكاسى ۆيتسە-پرەزيدەنتىنىڭ قۇقىقتىق جاعدايىن ايقىندايدى، سونداي-اق قازاقستان رەسپۋبليكاسىنىڭ بارلىق مەملەكەتتىك بيلىك سۋبەكتىلەرىنە قاتىستى پرەزيدەنت وكىلەتتىكتەرىن رەگلامەنتتەيدى. قازاقستان رەسپۋبليكاسىنىڭ پرەزيدەنتى - مەملەكەت باسشىسى، مەملەكەتىمىزدىڭ ىشكى جانە سىرتقى ساياساتىنىڭ نەگىزگى باعىتتارىن ايقىندايتىن جوعارى لاۋازىمدى تۇلعاسى بولىپ تابىلادى جانە ەل ىشىندە جانە حالىقارالىق قاتىناستاردا قازاقستان اتىنان وكىلدىك ەتەدى، - دەدى ول.
دەپۋتاتتىڭ ايتۋىنشا، پرەزيدەنت حالىق پەن مەملەكەتتىك بيلىك بىرلىگىنىڭ، كونستيتۋتسيا مىزعىماستىعىنىڭ، ادام مەن ازاماتتىڭ قۇقىقتارى مەن بوستاندىقتارىنىڭ سيمۆولى ءارى كەپىلى بولىپ قالا بەرمەك. قازاقستان رەسپۋبليكاسىنىڭ ۆيتسە-پرەزيدەنتىن قۇرىلتايدىڭ كەلىسىمىمەن پرەزيدەنت قىزمەتكە تاعايىندايدى جانە پرەزيدەنتتىڭ تاپسىرماسى بويىنشا قۇرىلتايمەن، ۇكىمەتپەن جانە وزگە دە مەملەكەتتىك ورگاندارمەن ءوزارا ءىس-قيمىل جاساۋ كەزىندە ونىڭ اتىنان وكىلدىك ەتەدى.
- زاڭ جوباسىنا سايكەس پرەزيدەنت باس پروكۋروردى، كونستيتۋتسيالىق سوتتىڭ، ۇلتتىق قاۋىپسىزدىك كوميتەتىنىڭ، جوعارى اۋديتورلىق پالاتانىڭ، ورتالىق سايلاۋ كوميسسياسىنىڭ، ۇلتتىق بانكتىڭ ءتوراعالارىن، ادام قۇقىقتارى جونىندەگى ۋاكىلدى جانە مەملەكەتتىك كۇزەت قىزمەتىنىڭ باستىعىن جەكە ءوزى تاعايىندايدى. پرەزيدەنت قۇرىلتايمەن كەلىسۋ بويىنشا ۆيتسە-پرەزيدەنتتى، پرەمەر-ءمينيستردى، كونستيتۋتسيالىق سوتتىڭ 10 سۋدياسىن، جوعارى اۋديتورلىق پالاتانىڭ 8 مۇشەسىن، ورتالىق سايلاۋ كوميسسياسىنىڭ 6 مۇشەسىن، سونداي-اق جوعارعى سوتتىڭ سۋديالارىن تاعايىندايدى جانە سايلايدى. وكىلەتتىكتەردىڭ وسىلايشا ءبولىنۋ ءتارتىبىن ورىندى دەپ ەسەپتەيمىز، ويتكەنى پرەزيدەنتىمىز ەلدىڭ دامۋ ۆەكتورلارىن ايقىندايتىن مەملەكەت باسشىسى بولا وتىرىپ، اتالعان ورگانداردىڭ باسشىلارىن بەلگىلەنگەن ستراتەگيالىق باعىتقا سۇيەنىپ تاعايىندايدى، - دەدى جاناربەك ءاشىمجان.
ايتا كەتەيىك، پارلامەنت تالقىلاپ جاتقان زاڭ جوباسىنا سايكەس، ۆيتسە- پرەزيدەنتتى قۇرىلتاي كەلىسىمىمەن پرەزيدەنت تاعايىندايدى.