بۇل تۋرالى «قازاقستان-قىتاي» ينۆەستيتسيالىق فورۋمىندا ايتتى.
وسىعان وراي پرەزيدەنت ەكى ەلدىڭ تابىستى سەرىكتەستىگىن ودان ءارى دامىتۋعا ارنالعان باسىم باعىتتاردى اتادى. قاسىم-جومارت توقايەۆ، ەڭ الدىمەن، كولىك-لوگيستيكا سالاسىنا توقتالدى.
- حالىقارالىق سەرىكتەستەرمەن بىرگە تەمىرجول قۋاتىن ارتتىرىپ، اۆتوموبيل ماگيسترالدارى مەن تەڭىز پورتتارىن كەڭەيتۋدى، جۇك تاسىمالى اۆياتسياسىن جانە شەكارا ماڭى ينفراقۇرىلىمىن دامىتۋدى قولعا الدىق. ليانيۋنگاننان اقتاۋعا دەيىن قىتاي جاعالاۋىن كاسپيمەن بايلانىستىراتىن لوگيستيكالىق توراپتار جەلىسى قالىپتاستى. كوپ ۇزاماي چىڭدۋ قالاسىنداعى قازاق-قىتاي تەرمينالى وسى لوگيستيكالىق تىزبەكتىڭ ماڭىزدى بۋىنىنا اينالادى. اتالعان شاھاردا قازاقستاننىڭ باس كونسۋلدىعىن اشۋدى جوسپارلاپ وتىرمىز. ازيا مەن ەۋروپا اراسىنداعى زاماناۋي كولىك بايلانىسىن تۇزەتىن ورتا ءدالىزدى وركەندەتۋدى ايرىقشا مىندەت دەپ سانايمىز،- دەدى پرەزيدەنت.
قاسىم-جومارت توقايەۆ بۇگىنگى فورۋمعا ترانزيت ايلاقتارىنىڭ وتكىزۋ مۇمكىندىگىن كەڭەيتۋ جۇمىستارىنا بەلسەندى اتسالىسىپ جاتقان كومپانيالار قاتىسىپ وتىرعانىن ايتتى. پرەزيدەنت بولجام بويىنشا 2029-جىلعا قاراي قىتايدان ەۋروپاعا قاتىنايتىن كونتەينەرلى پويىزداردىڭ سانى ءۇش مىڭعا دەيىن ۇلعاياتىنىن مالىمدەدى. بۇل جاھاندىق لوگيستيكا تىزبەگىندەگى ماڭىزدى كولىك حابتارىنىڭ ءبىرى رەتىندە قازاقستاننىڭ پوزيتسياسىن كۇشەيتەدى.
- ءبىرقاتار بىرلەسكەن باستامالار قازىردىڭ وزىندە ناقتىلانا ءتۇستى. بيىل تامىز ايىندا ارال - كاسپي اۆتوماگيسترالىنىڭ قۇرىلىسى باستالدى. جاڭا باعدار شىعىس - باتىس جولىنىڭ وتكىزۋ قابىلەتىن بىرنەشە ەسە ارتتىرادى. تاياۋ ۋاقىتتا مويىنتى - قىزىلجار، باقتى - اياگوز تەمىرجولدارىنىڭ قۇرىلىسى اياقتالادى. جۇك تاسىمالىنىڭ اشىقتىعىن «اقىلدى شەكارا» پيلوتتىق جوباسى اياسىندا بىرلەسە ەنگىزىلگەن سيفرلىق تەحنولوگيالار قامتاماسىز ەتەدى. قىتايلىق Minmetals Logistics كورپوراتسياسىمەن سەرىكتەستىك اياسىندا جۇرگىزۋشىسىز كولىك تەحنولوگيالارىن جانە سيفرلىق شەشىمدەردى قولداناتىن لوگيستيكا ءدالىزى تۇزىلەدى. بۇل - ءبىزدىڭ ەلىمىز ءۇشىن بىرەگەي جوبا. مۋلتيمودالدى جۇك تاسىمالىن دامىتۋعا ەرەكشە ءمان بەرەمىز. Alatau Air Cargo ۇلتتىق اۆيا جۇك جەتكىزۋشى كومپانياسى جۇمىسىن باستادى. قازاقستان نارىعىنا Cathay Pacific Cargo سەكىلدى الەمنىڭ جۇك تاسيتىن ءىرى اۋە كومپانيالارى شىعىپ جاتىر. ازاماتتىق اۆياتسيا دا ماڭىزدى ءرول اتقارادى. بيىل الماتى - شيان، الماتى - شاڭحاي، استانا - گۋاڭجوۋ، اقتاۋ - ءۇرىمجى رەيستەرى اشىلدى. وسى اپتادا العاشقى جولاۋشىلار باعدارى الماتى مەن چۋڭشيڭ قالالارىن تىكەلەي بايلانىستىردى، - دەدى مەملەكەت باسشىسى.