- قازاقستان Horizon Europe باعدارلاماسىنا قاۋىمداستىرىلعان مۇشە رەتىندە قوسىلۋ ءۇشىن كەلىسسوز باستادى. ماقساتىمىز - ەۋروپالىق زەرتتەۋ كەڭىستىگىنە كىرىگۋ. ەلىمىز شيكىزات ماتەريالدارى بويىنشا ەۋروپالىق سەرىكتەستىكتىڭ تولىققاندى مۇشەسى. بۇل ۇيىمنىڭ بيۋدجەتى 300 ميلليون ەۋرونى قۇرايدى. TiBeRIUM جوباسى وسىنداي ىنتىماقتاستىقتىڭ ناقتى مىسالى سانالادى. بيىل Horizon Europe باعدارلاماسىنىڭ 7,5 ميلليون ەۋرو قارجىلاي قولداۋىمەن جانە فرايبەرگ تاۋ-كەن اكادەمياسىنىڭ ۇيلەستىرۋىمەن ىسكە قوسىلعان جوبا شىعىس قازاقستان تەحنيكالىق ۋنيۆەرسيتەتى مەن ءۇلبى مەتاللۋرگيا زاۋىتىن ءبىر ىسكە جۇمىلدىردى. جوبا تيتان مەن بەريلييگە ارنالعان تومەن كومىرتەكتى ءوندىرىس تىزبەگىن ازىرلەۋدى ماقسات ەتەدى. بىزگە ءدال وسىنداي ىنتىماقتاستىق اياسىن كەڭەيتۋ قاجەت. سول ارقىلى ۋنيۆەرسيتەتتەر، عىلىم مەن ءوندىرىس ءبىر ارناعا توعىسىپ، جەتكىزۋ تىزبەگى نىعايادى. ناتيجەسىندە ءبىز شيكىزات رەسۋرستارىنان قوسىلعان قۇنى جوعارى ءونىم مەن تەحنولوگياعا كوشەمىز،-دەدى مەملەكەت باسشىسى.
پرەزيدەنتتىڭ ايتۋىنشا، تەحنولوگيا ترانسفەرى - سەرىكتەستىكتىڭ ءۇشىنشى باعىتى. قازاقستان عىلىمي زەرتتەۋلەرگە بولىنەتىن قارجى كولەمىن ىشكى جالپى ءونىمنىڭ 1 پايىزىنا دەيىن ارتتىرادى. سونىمەن قاتار كومپانيالاردى ۋنيۆەرسيتەت زەرتتەۋلەرىنە ينۆەستيتسيا قۇيۋعا ىنتالاندىرۋ تەتىكتەرىن ىسكە قوستى.
قاسىم-جومارت توقايەۆ نەمىس كاسىپكەرلەرىن بىرلەسكەن مەكەمەلەر جانىنان ينجەنەرلىك زەرتحانالار مەن ترانسفەر ورتالىقتارىن اشۋعا شاقىردى. سونداي-اق مۇنداي باستامالاردى قوسا قارجىلاندىرۋ ارقىلى قولداۋعا دايىن ەكەنىن جەتكىزدى.
ايتا كەتەلىك مەملەكەت باسشىسى گەرمانيانىڭ ماڭدايالدى جوعارى وقۋ ورىندارى رەكتورلارىمەن جانە عىلىمي ينستيتۋت جەتەكشىلەرىمەن كەزدەستى.