قاسىم-جومارت توقايەۆ تيمۋر تۋرلوۆتى حالىقارالىق شاحمات فەدەراتسياسىنىڭ پرەزيدەنتى بولىپ سايلانۋىمەن قۇتتىقتادى. پرەزيدەنتتىڭ ايتۋىنشا، بۇل قازاقستان مەن وتاندىق شاحمات مەكتەبىنىڭ الەمدىك ارەناداعى ابىرويى ارتىپ كەلە جاتقانىن كورسەتەدى.
مەملەكەت باسشىسى ەلىمىز ءۇشىن شاحماتتىڭ ورنى ەرەكشە ەكەنىنە توقتالدى. شاحمات سپورتتىڭ ءبىر ءتۇرى بولۋىمەن قاتار وسكەلەڭ ۇرپاقتىڭ زياتكەرلىك الەۋەتىن دامىتۋدىڭ ماڭىزدى تەتىگى سانالادى.
سوڭعى جىلدارى قازاقستاندىق شاحمات مەكتەبى قارقىندى دامىپ كەلە جاتىر. ەلىمىزدە سپورتتىڭ وسى تۇرىمەن 278 مىڭنان استام ادام جۇيەلى تۇردە اينالىسادى.
قاسىم-جومارت توقايەۆ سامارقاندتا وتكەن دۇنيەجۇزىلىك شاحمات وليمپياداسىندا كۇمىس مەدال يەلەنگەن ايەلدەر قۇراماسىنىڭ جارقىن جەتىستىگىن ايرىقشا اتاپ ءوتتى.
بۇدان بولەك، پرەزيدەنت قازاقستان شاحمات فەدەراتسياسىنىڭ الدىندا تۇرعان باسىم مىندەتتەردى اتادى.
مەملەكەت باسشىسى قۇراما كوماندانىڭ ازىرلىگىن كۇشەيتۋ، جاس تالانتتاردى انىقتاۋ مەن دايارلاۋدىڭ ءتيىمدى جۇيەسىن قۇرۋ، ءبىلىم بەرۋ سالاسىندا شاحماتتى ىلگەرىلەتۋ جانە وڭىرلەردە شاحمات ينفراقۇرىلىمىن دامىتۋ قاجەتتىگىنە نازار اۋداردى.
قاسىم-جومارت توقايەۆ وتاندىق باپكەرلەر مەن تورەشىلەردىڭ بىلىكتىلىگىن ارتتىرۋ، بىرلەسكەن ءبىلىم بەرۋ جوبالارىن ىسكە اسىرۋ، سونداي-اق قازاقستاندا شاحماتتان ءىرى حالىقارالىق جارىستار وتكىزۋ ءۇشىن ۇلتتىق فەدەراتسيا مەن FIDE اراسىنداعى ىنتىماقتاستىقتى نىعايتۋدىڭ ماڭىزىنا باسا ءمان بەردى.
كەزدەسۋ سوڭىندا قاسىم-جومارت توقايەۆ تيمۋر تۋرلوۆتىڭ جاۋاپتى قىزمەتىنە تابىس تىلەدى.
FIDE باسشىسى شاحماتتى دامىتۋعا دەن قويىپ، وعان قولداۋ كورسەتكەنى ءۇشىن قازاقستان پرەزيدەنتىنە ريزاشىلىعىن ءبىلدىردى. سونىمەن قاتار شاحماتتى الەمدە كەڭىنەن ناسيحاتتاۋ، حالىقارالىق ىنتىماقتاستىقتى نىعايتۋ جانە ۇلتتىق شاحمات فەدەراتسيالارىنىڭ قاتىسۋىمەن جاڭا جوبالاردى ىسكە اسىرۋ جونىندە مالىمەت بەردى.
ايتا كەتەلىك شاحماتتان سامارقاند قالاسىندا وتكەن 46-وليمپيادانىڭ ونىنشى تۋرىندا ارۋلارىمىز كەزەكتى جەڭىسىن تىركەپ، توپ-3 تەگى ورنىن ساقتاپ قالعان ەدى.