دەپۋتات ءوزىنىڭ ۇكىمەت كابينەتىندە مينيستر بولىپ جۇمىس ىستەگەن جىلدارىن ەسكە الدى.
- مەن ۇكىمەتتە جۇمىس ىستەگەندە دە، كەز كەلگەن ۋاقىتتا مەملەكەت باسشىسىنىڭ قابىلداۋىنا بارعاندا، پرەزيدەنتتىڭ ەڭ العاشقى قوياتىن سۇراعى - ۇستازداردى قورعاۋ جانە قولداۋ جايلى بولاتىن. راسىندا دا جەتى جىلدىڭ ىشىندە ءبىلىم سالاسىندا ۇستازدارعا قاتىستى ۇلكەن وڭ وزگەرىستەر قابىلداندى. ويتكەنى بۇل - مەملەكەت باسشىسىنىڭ ءوزىنىڭ شىنايى ىقىلاسى، شىنايى ويى. بۇگىن دە پرەزيدەنت بولەك توقتالىپ، ەرەكشە جىلۋلىقپەن ۇستازداردى قورعاۋ تۋرالى ايتتى، - دەدى دەپۋتات قۇرىلتاي كۋلۋارىندا.
ا. ايماعامبەتوۆ بۇرىن تەك قانا قاعازباستىلىق تۋرالى ايتىلسا، قازىر وعان قوسىمشا ءتۇرلى اقپاراتتىق جۇيەلەر پايدا بولعانىن اتاپ ءوتتى.
ونى ينتەگراتسيا ارقىلى باسقا مەملەكەتتىك ورگانداردان جيناۋدىڭ ورنىنا سول پەداگوگتەرگە، سول سىنىپ جەتەكشىلەرگە، سول مۇعالىمدەرگە تاپسىرما بەرىلىپ، جەكە دەرەكتەر جينالىپ جاتىر.
- ۇستازدار ساباق بەرە مە الدە جەكە دەرەك جيناپ، اتا-انادان ءسوز ەستي مە؟ پرەزيدەنت بۇگىن وسى ماسەلەنى كوتەردى. ەندى قۇرىلتاي دەپۋتاتتارى باستاماسىمەن ازىرلەنگەن جاڭا زاڭ جوباسىندا دا بۇل ماسەلە قامتىلادى. ەكىنشىدەن، مەملەكەت باسشىسى مۇعالىمدەرگە دورەكى سويلەۋ، ولاردىڭ قادىر-قاسيەتى جونىندە دە ءوز ويىن ايتتى. مۇنىڭ بارلىعى - مۇعالىمدەرىمىزگە دەگەن قامقورلىق، - دەدى اسحات ايماعامبەتوۆ.
بۇگىن پرەزيدەنت قاسىم-جومارت توقايەۆ ءوز جولداۋىندا ۇستازدىڭ ءبىلىم بەرۋىنە كەدەرگى كەلتىرەتىن باسى ارتىق جۇمىستاردى دوعارۋ كەرەگىن ايتقان ەدى.