مادەنيەت جانە اقپارات ءمينيسترى ارمان قىرىقبايەۆ مەملەكەت باسشىسىنىڭ اتىنان وتاندىق مادەنيەت، ونەر، ادەبيەت جانە مەديا سالاسىنىڭ دامۋىنا ەلەۋلى ۇلەس قوسقان 62 ازاماتقا مەملەكەتتىك ناگرادالار تابىستادى.
سالتاناتتى راسىمدە مينيستر ماراپات يەلەرىن قۇتتىقتاپ، مادەنيەت پەن ونەردىڭ قوعامنىڭ رۋحاني تۇتاستىعىن بەكەمدەۋدەگى ماڭىزىن ايرىقشا اتاپ ءوتتى.
- مەملەكەت باسشىسى قاسىم-جومارت توقايەۆ مادەنيەت پەن ونەردى دامىتۋ، تاريحي مۇرانى ساقتاۋ جانە ساپالى اقپارات كەڭىستىگىن قالىپتاستىرۋدىڭ ماڭىزىن ۇدايى ايتىپ كەلەدى. سەبەبى، بۇل - قوعامنىڭ رۋحاني دامۋى مەن ەل بولاشاعىنا قىزمەت ەتەتىن ورتاق مىندەتتەر، - دەدى ارمان قىرىقبايەۆ.
ماراپاتتالعاندار قاتارىندا «استانا وپەرا» مەملەكەتتىك وپەرا جانە بالەت تەاترىنىڭ، كۇلاش بايسەيىتوۆا اتىنداعى قازاق ۇلتتىق ونەر ۋنيۆەرسيتەتىنىڭ، ەركەعالي راحماديەۆ اتىنداعى مەملەكەتتىك اكادەميالىق فيلارمونيانىڭ، روزا باعلانوۆا اتىنداعى «قازاقكونسەرت» مەملەكەتتىك اكادەميالىق كونتسەرتتىك ۇيىمىنىڭ، قۇرمانعازى اتىنداعى قازاق ۇلتتىق كونسەرۆاتورياسىنىڭ جانە وزگە دە مادەنيەت پەن ونەر مەكەمەلەرىنىڭ وكىلدەرى بار.
سونداي-اق «Qazaqstan» تەلەارناسىنىڭ، «حابار» اگەنتتىگىنىڭ قىزمەتكەرلەرى جانە ارداگەرلەرى، «Balapan» ،«Abai TV»، «استانا» تەلەارنالارىنىڭ، «كازاحستانسكايا پراۆدا» رەسپۋبليكالىق گازەتىنىڭ، ق ر ۇلتتىق كىتاپحاناسى مەن ق ر ۇلتتىق مۋزەيىنىڭ وكىلدەرى مەملەكەتتىك ناگرادالارعا يە بولدى.
ءراسىم سوڭىندا مينيستر ماراپات يەلەرىن رەسپۋبليكا كۇنىمەن قۇتتىقتادى. ارمان قىرىقبايەۆ ۇلتتىق مەرەكەنىڭ ەل ەگەمەندىگىن ايشىقتاپ، حالىق بىرلىگىن نىعايتۋداعى ماڭىزىنا توقتالدى. سونداي-اق سالا ماماندارىنا كوپ جىلعى ادال ەڭبەگى ءۇشىن العىس ايتىپ، زور دەنساۋلىق، باق-بەرەكە، شىعارماشىلىق شابىت پەن كاسىبي تابىس تىلەدى.
مەملەكەت باسشىسى قاسىم-جومارت توقايەۆ رەسپۋبليكا كۇنىنە ارنالعان سالتاناتتى جيىندا سويلەگەن سوزىندە رەسپۋبليكا كۇنى - كۇللى حالقىمىزدىڭ باسىن قوساتىن، جالپىۇلتتىق سيپاتى بار بىرەگەي مەرەكە ەكەنىنە توقتالدى.