پرەزيدەنتتىڭ وليمپيادا جۇلدەگەرلەرىمەن كەزدەسۋى شەگەرىلدى - سپورتشىلاردان COVID انىقتالدى
استانا. قازاقپارات - 2024-جىلدىڭ 15-تامىزىندا ق ر پرەزيدەنتى قاسىم-جومارت توقايەۆ پاريج وليمپياداسىنىڭ جەڭىمپازدارى مەن جۇلدەگەرلەرىمەن كەزدەسەدى دەپ جوسپارلانعان بولاتىن. ءبىراق بۇل ءىس-شارا كەيىنگە شەگەرىلدى.
بۇل تۋرالى ق ر پرەزيدەنتىنىڭ كەڭەسشىسى - پرەزيدەنتتىڭ باسپا ءسوز حاتشىسى بەرىك ءۋالي ايتتى.
ايتا كەتەيىك، 14-تامىزدا مەملەكەت باسشىسى قاسىم-جومارت توقايەۆتىڭ جارلىعىمەن پاريج قالاسىندا وتكەن XXXIII جازعى وليمپيادا ويىندارىنداعى جوعارى سپورتتىق جەتىستىكتەرى ءۇشىن قازاقستان ۇلتتىق قۇراماسىنىڭ ءبىر توپ سپورتشىسى مەن باپكەرى مەملەكەتتىك ناگرادالارمەن ماراپاتتالدى.
Zakon.kz- ءتىڭ جازۋىنشا، ب. ءۋالي پرەزيدەنتتىڭ پاريج وليمپياداسىنىڭ جەڭىمپازدارى مەن جۇلدەگەرلەرىمەن كەزدەسۋى نە سەبەپتى كەيىنگە شەگەرىلگەنىن ءتۇسىندىردى.
«وزدەرىڭىزگە بەلگىلى، پرەزيدەنت كەشە پاريج وليمپياداسىنىڭ جۇلدەگەرلەرى مەن باپكەرلەر قۇرامىن مەملەكەتتىك ناگرادالارمەن ماراپاتتاۋ تۋرالى جارلىققا قول قويدى. قاسىم-جومارت كەمەل ۇلى ۇلتتىق قۇراما مۇشەلەرىمەن بۇگىن كەزدەسۋدى جوسپارلاعان بولاتىن. وكىنىشكە قاراي، اتلەتتەر مەن جاتتىقتىرۋشىلاردىڭ جارتىسىنان كوروناۆيرۋس ينفەكتسياسى انىقتالدى. سول سەبەپتى كەزدەسۋ كەيىنگە شەگەرىلدى. سپورتشىلار مەن باپكەرلەردىڭ تەزىرەك ساۋىعىپ كەتۋىنە تىلەكتەسپىز»، - دەدى ق ر پرەزيدەنتىنىڭ كەڭەسشىسى - پرەزيدەنتتىڭ باسپا ءسوز حاتشىسى.
ونىڭ ايتۋىنشا، مەملەكەت باسشىسى وليمپيادا جۇلدەگەرلەرىن مىندەتتى تۇردە قابىلدايدى. كەزدەسۋ تامىز ايىنىڭ سوڭىندا اقوردادا وتەدى دەپ جوسپارلانىپ وتىر.