پرەزيدەنتتىڭ تاجىكستانعا ساپارىندا تاريحي قادامدار بولادى - ساراپشى

قازاقستان پرەزيدەنتى قاسىم- جومارت توقايەۆ 22-23-تامىزدا مەملەكەتتىك ساپارمەن تاجىكستانعا بارماق. ساپار الدىندا ءبىرقاتار قۇجاتتارعا قول قويىلاتىنى جايىندا بولجامدار ايتىلۋدا.

وسى ورايدا جاڭا كەلىسىمدەر قاي باعىتتا ءوربۋى مۇمكىن ەكەنىن بىلمەككە ق ز س ي باس ساراپشىسى ءاليا مۇسابەكوۆاعا حابارلاسقان ەدىك.

ساراپشىنىڭ ايتۋىنشا، ساپار اياسىندا جوعارى دەڭگەيدەگى جانە كەڭەيتىلگەن ۇكىمەتارالىق فورماتتا كەلىسسوزدەر وتەدى. سوندىقتان ازىرلەنىپ جاتقان قۇجاتتار پاكەتىنىڭ اۋقىمى كەڭ.

- بۇل ساپاردىڭ باستى ەرەكشەلىگى - وداقتاستىق قاتىناستار تۋرالى شارتقا قول قويۋ. بۇل تاريحي قادام ەكى ەل اراسىنداعى قارىم- قاتىناستاردى، سەرىكتەستىكتى، ءوزارا ءىس- قيمىلدى ساپالى جاڭا دەڭگەيگە شىعارادى. تاۋەلسىزدىك العاننان بەرى قازاقستان مەن تاجىكستان دوستىققا بەرىك، ءوزارا ءتيىمدى ىنتىماقتاستىق بايلانىستىرىپ تۇر. تاجىكستاندا ىشكى تۇراقسىزدىق بولعان كەزدە قازاقستان گۋمانيتارلىق جانە اسكەري كومەك كورسەتتى. دۋشانبە ساراپشىلارى مۇنى ىلعي ايتىپ وتىرادى، - دەيدى ول.

سونداي- اق ساراپشى قاۋىپسىزدىك ماسەلەلەرى ەكىجاقتى كۇن تارتىبىندە ماڭىزدى بولىپ تۇرعانىن تىلگە تيەك ەتتى. قازاقستان مەن تاجىكستان وڭىردەگى قاۋىپسىزدىكتىڭ ورنىقتى قۇرىلىمىن قالىپتاستىرۋ ءۇشىن بىرلەسىپ جۇمىس ىستەمەك.

- قازاقستان تاجىكستاننىڭ ۇزدىك 5 ساۋدا-ەكونوميكالىق سەرىكتەسىنىڭ قاتارىنا كىرەدى جانە نەگىزگى ينۆەستورلاردىڭ ءبىرى بولىپ سانالادى. بۇگىندە تاجىكستان - ورتالىق ازياداعى ەكونوميكالىق ءوسىمنىڭ ەڭ جوعارى قارقىنى بار مەملەكەت. 2023 -جىلى 8,3 پايىزدى قۇراسا، 2024 -جىلدىڭ باسىندا 8,2 پايىزدى ۇستاپ تۇردى. ەكونوميستەر مۇنداي جاقسى ءوسۋ ديناميكاسىن التىن ەكسپورتىنان تۇسەتىن كىرىستەردىڭ ۇلعايۋىمەن، ينفراقۇرىلىمعا مەملەكەتتىك سالىمداردىڭ بولۋىمەن بايلانىستىرادى، - دەپ تۇيىندەدى ءاليا مۇسابەكوۆا.

بۇعان دەيىن مەملەكەت باسشىسى قاسىم-جومارت توقايەۆ 22-23- تامىز كۇندەرى تاجىكستان رەسپۋبليكاسىنا مەملەكەتتىك ساپارمەن باراتىنىن حابارلاعان ەدىك.