پرەزيدەنتكە قاتار مەملەكەتىنىڭ نەگىزىن قالاعان شەيح دجاسيم بەن مۇحاممەد بەن تانيدىڭ قىلىشى تابىستالدى

مەملەكەتتىڭ نەگىزىن قالاۋشى شەيح دجاسيم بەن مۇحاممەد بەن تانيدىڭ قىلىشى - قاتاردىڭ ەڭ جوعارى مەملەكەتتىك سيمۆولى. ونى مونارحتارعا، حانزادالارعا جانە مەملەكەتتەر باسشىلارىنا قاتار مەملەكەتىنە جانە بۇكىل ادامزاتتىڭ دامۋىنا قوسقان ۇلەسى ءۇشىن ءامىردىڭ ءوزى تابىستايدى.

بۇل قىلىش العاش رەت ساۋد ارابياسىنىڭ كورولى سالمان بەن ابدۋلازيز ءال ساۋدقا تابىس ەتىلگەن (2016). كەيىنىرەك قىلىش ومان سۇلتانى حايسام بەن تارەككە (2021) جانە يسپانيا كورولى VI فيليپپكە (2022) سىيعا تارتىلدى.

بۇل سيمۆول - قاتار مەملەكەتىنىڭ نەگىزىن قالاۋشى شەيح دجاسيم بەن مۇحاممەد بەن ءتاني (1827-1913) ۇستاعان قىلىشتىڭ دالمە-ءدال كوشىرمەسى. قىنى التىنمەن (18 كارات) اپتالعان، ەكى جاعى اشەكەيلەنگەن. ءجۇزى باعالى، توت باسپايتىن بولاتتان قۇيىلعان، ال سابى تۇيە سۇيەگىنەن جاسالىپ، اگاتپەن جانە تۋرمالينمەن قاپتالعان.