پرەزيدەنت ىشكى ىستەر مينيسترىنە «زاڭ جانە ءتارتىپ» قاعيداتىن قامتاماسىز ەتۋدى تاپسىردى

 پرەزيدەنت قاسىم- جومارت توقايەۆ ىشكى ىستەر ءمينيسترى ەرجان سادەنوۆتى قابىلدادى، دەپ حابارلايدى Kazinform.

مەملەكەت باسشىسىنا قازاقستانداعى كريمينوگەندىك جاعداي تۋرالى باياندالدى.

ەرجان سادەنوۆ ەلىمىزدە جاسالاتىن قىلمىستار سانىنىڭ تومەندەۋ ديناميكاسى ساقتالىپ وتىرعانىن، كىسى ءولتىرۋ 20 پايىزعا، ۇرلىق 28 پايىزعا، قاراقشىلىق 32 پايىزعا ازايعانىن ايتتى.

سونىمەن قاتار توناۋ، بۇزاقىلىق، مال ۇرلىعى، دەنساۋلىققا اۋىر زيان كەلتىرۋ فاكتىلەرى، سونداي- اق باسقا دا قىلمىس تۇرلەرى تومەندەگەنىن باياندادى.

پرەزيدەنتكە قۇقىقبۇزۋشىلىققا مۇلدە توزبەۋشىلىك قاعيداتىن قالىپتاستىرۋ، زاڭعا قايشى ارەكەتتەر مەن قىلمىس جاساعانى ءۇشىن جازانىڭ بۇلتارتپاستىعىن ىسكە اسىرۋ، جول قاۋىپسىزدىگىن قامتاماسىز ەتۋ جۇمىستارى تۋرالى مالىمەت بەرىلدى. بۇگىندە 8 ميلليون 500 مىڭ زاڭعا قايشى ارەكەت انىقتالعان. بۇل وتكەن جىلمەن سالىستىرعاندا 1 ميلليونعا كوپ. جاسالعان قۇقىقبۇزۋشىلىقتار ءۇشىن 90 ميلليارد تەڭگە كولەمىندە اكىمشىلىك ايىپپۇل سالىندى، 71 ميلليارد تەڭگە ءوندىرىپ الىندى.

كەزدەسۋدە ىشكى ىستەر ورگاندارىنىڭ جۇمىسىن جەتىلدىرۋ، سونىڭ ىشىندە ءى ءى و قىزمەتكەرلەرىن اتتەستاتسيادان وتكىزىپ، ۆەدومستۆونى لايىقسىز مامانداردان تازارتۋ شارالارى تۋرالى باياندالدى.

كەزدەسۋ سوڭىندا قاسىم- جومارت توقايەۆ «زاڭ جانە ءتارتىپ» قاعيداتىن قامتاماسىز ەتۋ جونىندە ءبىرقاتار ناقتى تاپسىرما بەردى.

مەملەكەت باسشىسى قوعامدا ادىلدىك پەن ءتارتىپ ورناتۋ ءۇشىن قۇقىق قورعاۋ ورگاندارىنىڭ قىزمەتكەرلەرىنە ۇلكەن جاۋاپكەرشىلىك جۇكتەلگەنىن ايتتى.