پرەزيدەنت تۇركىستان وبلىسىنىڭ اكىمى دارحان ساتىبالدىنى قابىلدادى

  استانا. KAZINFORM - مەملەكەت باسشىسىنا تۇركىستان وبلىسىنىڭ بىلتىرعى الەۋمەتتىك-ەكونوميكالىق دامۋى تۋرالى ەسەپ بەرىلدى.

وتكەن جىلدىڭ قورىتىندىسى بويىنشا ايماقتىڭ نەگىزگى ماكروەكونوميكالىق كورسەتكىشتەرىندە وڭ ديناميكا بايقالادى.

اتاپ ايتقاندا، وڭىردەگى ونەركاسىپ ءونىمىنىڭ كولەمى %2,5 ءوسىپ، 1 تريلليون تەڭگەدەن اسقان. وڭدەۋ ونەركاسىبىن دامىتۋ ءۇشىن جالپى سوماسى 30,2 ميلليارد تەڭگە بولاتىن 20 جوبا ىسكە قوسىلىپ، 594 جاڭا جۇمىس ورنى اشىلعان؛

الداعى 5 جىلدا ءوڭىردىڭ ءوز كىرىسىن 100 ميلليارد تەڭگەگە ارتتىرۋ جوسپارلانىپ وتىر.

الدىن الا ەسەپ بويىنشا بىلتىر جالپى وڭىرلىك ءونىم كولەمى 3,8 تريلليون تەڭگە بولعان.

ال اۋىل شارۋاشىلىعىنداعى ءونىم كولەمى 1,1 تريلليون تەڭگەنى قۇراعان. بۇل كورسەتكىش بويىنشا تۇركىستان وبلىسى رەسپۋبليكادا كوش باستاپ تۇر.

سالانى ءارتاراپتاندىرۋ ناتيجەسىندە 3,3 ميلليون توننا كوكونىس، باقشا ونىمدەرى جينالدى. بۇل - رەكوردتىق كورسەتكىش.

اۋىل شارۋاشىلىعىندا ءونىم كولەمىن ارتتىرۋعا، سۋدى ۇنەمدەۋگە ىقپال ەتەتىن جاڭا ءادىس-تاسىلدەر مەن تەحنولوگيالار ەنگىزىلىپ جاتىر.

وبلىستاعى كاسىپكەرلىك سۋبەكتىلەرىنىڭ سانى 211 مىڭعا جەتىپ، 1,6 تريلليون تەڭگەنىڭ ءونىمى وندىرىلگەن.

وبلىستا جالپى سوماسى 407,5 ميلليارد تەڭگە بولاتىن قۇرىلىس جۇمىستارى جۇرگىزىلىپ، 898,9 مىڭ شارشى مەتر تۇرعىن ءۇي پايدالانۋعا بەرىلگەن.

ءۇش مىڭعا جۋىق وتباسى باسپانالى بولدى.

بىلتىر بيۋدجەت ەسەبىنەن 35 مەكتەپتىڭ قۇرىلىسى جۇرگىزىلىپ، 20 مەكتەپ اشىلدى.

«جايلى مەكتەپ» جوباسى اياسىندا وبلىستا ءۇش جىل ىشىندە 49 مىڭ وقۋشىعا ارنالعان 63 مەكتەپ سالىنادى.

وتكەن جىلى وبلىستاعى 20 ەلدى مەكەنگە جاڭادان اۋىزسۋ قۇبىرى تارتىلدى. توعىز اۋىلداعى ەسكىرگەن سۋ تارتۋ جۇيەلەرى جاڭارتىلدى.

62 گازبەن قامتۋ نىسانىنىڭ قۇرىلىسى اياقتالىپ، 48 ەلدى مەكەنگە كوگىلدىر وتىن جەتكىزىلدى.

كەزدەسۋ سوڭىندا قاسىم-جومارت توقايەۆ وبلىس اكىمىنە حالىقتىڭ ءال-اۋقاتىن ارتتىرۋ، ءوڭىردىڭ ەكونوميكالىق جاعدايىن جاقسارتۋ جونىندە بەرگەن تاپسىرمالارىن جۇيەلى ءارى ساپالى ورىنداۋ قاجەت ەكەنىن ايتتى.

سونداي- اق تۇركىستان ءوڭىرىن دامىتۋ جۇمىستارىن جالعاستىرۋدى تاپسىردى.