پرەزيدەنت ۆەتنام كومپارتياسى ورتالىق كوميتەتى ساياسي بيۋروسىنىڭ مۇشەسى نگۋەن سۋان تحانگتى قابىلدادى
استانا. KAZINFORM - پرەزيدەنت قاسىم-جومارت توقايەۆ ۆەتنام كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، حو شي مين اتىنداعى ۇلتتىق ساياسات اكادەمياسىنىڭ ديرەكتورى نگۋەن سۋان تحانگپەن كەزدەستى.
اڭگىمەلەسۋ بارىسىندا مەملەكەت باسشىسى بۇگىندە قازاق-ۆەتنام قاتىناستارى قارقىندى دامىپ كەلە جاتقانىن اتاپ ءوتتى. پرەزيدەنت ۆەتنامعا جاساعان بىلتىرعى رەسمي ساپارىن ىقىلاسپەن ەسكە الدى. حانوي ساپارى بارىسىندا جۇرگىزىلگەن ماڭىزدى كەلىسسوزدەر ەكىجاقتى ىنتىماقتاستىققا ايتارلىقتاي سەرپىن بەردى.
قاسىم-جومارت توقايەۆتىڭ ايتۋىنشا، ۆەتنام - ەلىمىزدىڭ وڭتۇستىك- شىعىس ازياداعى نەگىزگى سەرىكتەسى. قازاقستان ساۋدا- ەكونوميكالىق، ينۆەستيتسيالىق، مادەني- گۋمانيتارلىق سالالارداعى ەكىجاقتى قاتىناستاردى جان-جاقتى نىعايتۋعا دايىن.
بۇدان بولەك، مەملەكەت باسشىسى قازاقستان مەن ۆەتنامنىڭ الەۋمەتتىك- ەكونوميكالىق دامۋىن زاڭنامالىق تۇرعىدان قامتاماسىز ەتۋ ءۇشىن پارلامەنتارالىق ىنتىماقتاستىقتى جانداندىرۋدىڭ ماڭىزىنا توقتالدى.
نگۋەن سۋان تحانگ ەلدىڭ ورتالىق كوميتەتى ساياسي بيۋروسى مەن ۇلتتىق جينالىسى قازاقستان پرەزيدەنتىنىڭ ۆەتنامعا ساپارى كەزىندە قول جەتكىزىلگەن ۋاعدالاستىقتاردى جۇزەگە اسىرۋعا بەلسەندى اتسالىسىپ جاتقانىن ايتتى.
ونىڭ پىكىرىنشە، ەلدەرىمىزدىڭ ۇستانىمدارى ۇقساس ءارى ب ۇ ۇ، ا و س ش ك سياقتى كوپجاقتى الاڭداردا تابىستى ىنتىماقتاستىق ورناتقان.
قاسىم-جومارت توقايەۆ قازاقستاننىڭ ستراتەگيالىق زەرتتەۋلەر ينستيتۋتى مەن حو شي مين اتىنداعى ۇلتتىق ساياسات اكادەمياسى اراسىندا ىنتىماقتاستىق جونىندەگى مەموراندۋمعا قول قويىلعانىن قۇپتادى. بۇل قۇجاتتىڭ بىرلەسكەن عىلىمي زەرتتەۋلەرگە تىڭ سەرپىن بەرەتىنىنە سەنىم ءبىلدىردى.
مەملەكەت باسشىسى ۆەتنام پرەزيدەنتى لىونگ كىونگتى كەلەسى جىلى قازاقستانعا ساپارمەن كەلۋگە شاقىردى ءارى ونى استانا حالىقارالىق فورۋمىمەن ورايلاستىرۋدى ۇسىندى.