استانا. KAZINFORM - پرەزيدەنت قاسىم-جومارت توقايەۆ پاكىستان پرەمەر-ءمينيسترى شاحباز شاريف پەن پاكىستان قارۋلى كۇشتەرىنىڭ باس قولباسشىسى، فەلدمارشال اسيم مۋنيردىڭ ارااعايىندىعى ارقىلى تاياۋ شىعىستاعى سوعىستى تولىق توقتاتۋ جانە بىتىمگە كەلۋ تۋرالى كەلىسىمگە قول جەتكىزىلۋىن قۇپتايدى. بۇل تۋرالى ق ر پرەزيدەنتىنىڭ كەڭەسشىسى - باسپا ءسوز حاتشىسى ايبەك سمادياروۆ ءمالىم ەتتى.
- بۇل كەلىسىم ا ق ش پرەزيدەنتى دونالد ترامپتىڭ جانە يراننىڭ جوعارعى باسشىلىعىنىڭ، سونداي-اق اسكەري قاقتىعىسقا قاتىسقان ەلدەردىڭ ىزگى نيەتى مەن پاراساتتىلىعىنىڭ ارقاسىندا مۇمكىن بولدى. مەملەكەت باسشىسى الەمدىك ساۋدانىڭ دامۋىنا جانە بارلىق مەملەكەتتىڭ ەكونوميكالىق وركەندەۋىنە جاعداي جاساۋ ماقساتىندا قول جەتكىزىلگەن بىتىمگەرشىلىك كەلىسىمنىڭ ۇزاق مەرزىمدى سيپاتقا يە بولاتىنىنا ءۇمىت ءبىلدىردى، - دەلىنگەن حابارلامادا.
ەسكە سالا كەتەيىك، بۇعان دەيىن پرەزيدەنت ەڭبەك جاعدايلارىن جەتىلدىرۋگە قاتىستى زاڭعا قول قويعان بولاتىن.
Бейсен Сұлтан
Сұлтан Бейсен Әл-Фараби атындағы ҚазҰУ-дың журналистика факультетінің түлегі. Еңбек жолын 2007 жылы "Жазушы" баспасында редактор болып бастаған. 2008 жылы "Ара" журналында, 2010-2011 жылы Алматы облысының "Талдықорған кеші" газетінде тілші, 2012 жылы "Талдықорған Севен" газетінде тілші болып жұмыс істеген. 2013 жылы сәуір айынан бастап "ҚазАқпарат" ХАА-нде Төте жазу редакциясында шығарушы редактор болып жұмысқа орналасқан