پرەزيدەنت تاپسىرماسى: كاتونقاراعايدا اۋەجاي قاشان سالىنادى

وسكەمەن. KAZINFORM - شىعىس قازاقستان وبلىسى كاتونقاراعاي اۋدانىندا سالىناتىن اۋەجايدىڭ قۇرىلىسى 2025 -جىلدىڭ سوڭىنا دەيىن اياقتالۋى ءتيىس. الايدا ازىرگە اۋەجاي سالۋعا قانشا قاراجات جۇمسالاتىنى بەلگىسىز.

مەملەكەت باسشىسى قاسىم-جومارت توقايەۆ بيىلعى «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى جولداۋىندا كاتونقاراعاي مەن كەندىرلىگە اۋە قاتىناسىن رەتتەۋدى تاپسىرعان بولاتىن.

«بالقاش جانە الاكول دەمالىس ايماقتارىنداعى ۇشۋ-قونۋ جولاقتارى تولىق جاڭعىرتىلدى. قاتونقاراعاي، زايسان جانە كەندىرلى وڭىرلەرىنىڭ دە تۋريستىك الەۋەتىن دۇرىس پايدالانۋ قاجەت. وسىنداي دەمالىس ايماقتارىندا ساپاسى جوعارى جول ينفراقۇرىلىمى بار اۋە بەكەتتەرى مەن اۋەجايلار سالۋ كەرەك. ونەركاسىپتى دامىتۋ قورىنىڭ ەسەبىنەن كىشى اۆياتسيا ۇشاقتارىن العان ءجون»، - دەدى پرەزيدەنت.

وسى رەتتە شىعىس قازاقستانداعى تابيعاتتىڭ تاماشاسىن بويىنا سىڭىرگەن كاتونقاراعاي جەرىنە سالىناتىن اۋەجاي جايلى تولىعىراق ماعلۇمات الۋ ءۇشىن ش ق و جولاۋشى كولىگى جانە اۆتوموبيل جولدارى باسقارماسىنا ساۋالحات جولداپ كوردىك.

«بۇگىنگى تاڭدا اۋەجاي قۇرىلىسىنا الدىن الا ۇلكەن نارىن جانە كاتونقاراعاي اۋداندارى شەكارالارى ماڭىندا ورنالاسقان سولداتوۆو ەلدى مەكەنىنە جاقىن جەر ۋچاسكەسى تاڭدالىپ وتىر. وسى ۋچاسكەدە اۋەجاي سالۋ ەسەبىنەن جاقىن ماڭداعى اۋدانداردىڭ ەلدى مەكەندەرىن اۋە قاتىناسىمەن قامتۋ جوسپارلانعان. قۇرىلىس شەڭبەرىندە ۇزىندىعى كەمىندە 2200 مەتر، ەنى كەمىندە 35 مەتر جاساندى ۇشۋ-قونۋ جولاعى جايلاستىرىلادى. اۋە ايلاعىنىڭ بۇل پارامەترلەرى Fokker 50, Bombardier CRJ-200, Bombardier Q400, Embraer EMB 120ER جانە باسقا دا ۇقساس تيپتەگى اۋە كەمەلەرىن پايدالانۋ مۇمكىندىگىن قامتاماسىز ەتەدى»، - دەپ جاۋاپ بەردى باسقارما باسشىسىنىڭ ورىنباسارى قۋانىش اكراموۆ.

اۋەجايدى جوبالاۋ جانە سالۋ جونىندەگى جۇمىستاردى «قازايروناۆيگاتسيا» ر م ك قاراجاتى ەسەبىنەن جۇرگىزىلمەك.

«ىسكە اسىرۋ مەرزىمى – 18 اي. ناقتى ايتقاندا، جوبالاۋ - 2024 -جىلدىڭ سوڭىنا دەيىن، قۇرىلىس- مونتاجداۋ جۇمىستارىن اياقتاۋ - 2025 -جىلدىڭ سوڭىنا دەيىن. اۋەجاي سالۋعا جۇمسالاتىن قاراجاتتىڭ جالپى مولشەرى جوبالىق- سمەتالىق قۇجاتتاماعا «مەم ساراپتاما» ر م ك وڭ قورىتىندىسىن العاننان كەيىن ايقىندالاتىن بولادى»، - دەيدى قۋانىش اكراموۆ.

ايتا كەتەيىك، قاتونقاراعاي اۋدانىنا ەلدىڭ ءار تۇكپىرىنەن عانا ەمەس، شەت مەملەكەتتەردەن دە تۋريستەر كەلەدى. اسىرەسە وسىنداعى ۇلتتىق تابيعي پاركتى كورگىسى كەلەتىندەر كوپ. جىل سايىن پارككە 10 مىڭعا جۋىق تۋريست تابان تىرەيدى.

اۆتور

تالعاتجان مۇحامەتبەك ۇلى