پرەزيدەنت سوتتى ونلاي كورسەتۋ جايىندا: سوت جۇيەسىنە سەنىم نىعايا تۇسەدى

استانا. KAZINFORM - بۇگىن قازاقستان سۋديالارىنىڭ سەزىندە ق ر پرەزيدەنتى قاسىم-جومارت توقايەۆ سوتتى ونلاين وتكىزۋدىڭ ۇتىمدى جاقتارىن ايتتى.

مەملەكەت باسشىسى بيىل سوت وتىرىستارى العاش رەت ونلاين كورسەتىلە باستاعانىن، وسىنداي تاسىلمەن بىرنەشە سوت پروتسەسى وتكەنىن ەسكە سالدى.

«مۇنداي قادام جۇرتتىڭ سوت جۇيەسىنە سەنىمىن نىعايتا ءتۇستى دەۋگە بولادى. بۇل ارينە، بۇرىن-سوڭدى بولماعان. سوندىقتان، سۋديالار مەن ايىپتاۋشىلارعا قويىلاتىن تالاپ كۇشەيدى. سوتقا قاتىساتىن تاراپتار اشىق سوت الاڭىندا ءوز ويلارىن ەركىن جەتكىزە الادى. بارلىق سوت وتىرىسىندا وسىنداي جوعارى ستاندارت بولۋى كەرەك. سوتتى ونلاين وتكىزۋدىڭ تاعى ءبىر ۇتىمدى تۇسى بار. ازاماتتاردىڭ قۇقىقتىق سانا- سەزىمى وزگەرىپ كەلەدى. زاڭگەر ماماندىعىنا دەگەن قىزىعۋشىلىق ارتتى. جاستار زاڭ سالاسىنداعى مامانداردى ۇلگى تۇتا باستادى. مۇنىڭ ءبارى - قوعامدا كاسىبي مامان بولۋ قۇندىلىعىن دارىپتەۋگە مۇمكىندىك بەرەدى»، - دەدى قاسىم-جومارت توقايەۆ.

پرەزيدەنتتىڭ پايىمىنشا، جالپى سوتتى ونلاين وتكىزۋ جۇرتتىڭ قۇقىقتىق مادەنيەتىن كوتەرۋگە وڭ اسەرىن ەتىپ وتىر. بۇل ەلىمىزدە زاڭ مەن ءتارتىپ قاعيداتىن ورنىقتىراتىن ءتيىمدى ءتاسىل.

ەسكە سالا كەتەيىك، بيىل ەكس-مينيستر قۋاندىق بيشىمبايەۆقا، جەدەل جاردەم جۇرگىزۋشىسىن سوققىعا جىققان نۇربولات داكەبايەۆقا، سونداي-اق اۆتوبۋس جۇرگىزۋشىسىن ۇرعان دارحان احمەتجانوۆقا قاتىستى سوت ونلاين تارتىپتە كورسەتىلدى.