پرەزيدەنت سولتۇستىك ماكەدونيا پرەزيدەنتىمەن كەزدەستى

استانا. KAZINFORM - مەملەكەت باسشىسى مارتەبەلى مەيمانعا ءىلتيپات ءبىلدىرىپ، ونىڭ ساپارى استانا مەن سكوپە اراسىنداعى ديپلوماتيالىق قارىم-قاتىناستاردىڭ 30 جىلدىعى قارساڭىندا ءوتىپ جاتقانىن اتاپ ءوتتى. بۇل تۋرالى اقوردانىڭ باسپا ءسوز قىزمەتى حابارلادى.

- قازاقستان سولتۇستىك ماكەدونيامەن جان-جاقتى سەرىكتەستىكتى دامىتۋعا مۇددەلى جانە ءسىزدىڭ ەلىڭىزدى بالقان تۇبەگىندەگى سەنىمدى ارىپتەس رەتىندە قاراستىرامىز، - دەدى قاسىم-جومارت توقايەۆ.

گوردانا سيليانوۆسكا-داۆكوۆا قازاقستانعا شاقىرعانى ءۇشىن پرەزيدەنتكە العىس ايتىپ، ەكىجاقتى ىقپالداستىقتى ودان ءارى نىعايتۋعا زور الەۋەت بار ەكەنىن جەتكىزدى.

تاراپتار ساۋدا-ەكونوميكالىق، ينۆەستيتسيالىق جانە گۋمانيتارلىق سالالارداعى ىنتىماقتاستىقتى ەگجەي-تەگجەيلى تالقىلادى.

پرەزيدەنتتەر قازاقستان-سولتۇستىك ماكەدونيا قارىم-قاتىناستارىنىڭ بارلىق سالاسىنا تىڭ سەرپىن بەرۋگە ۋاعدالاستى. اسىرەسە، اۋىل شارۋاشىلىعى، كولىك-لوگيستيكا، قارجى جانە تۋريزم سياقتى پەرسپەكتيۆتى باعىتتارعا نازار اۋدارىلدى.

مەملەكەتتەر باسشىلارى سولتۇستىك ماكەدونيانىڭ تانىمال Alkaloid فارماتسيەۆتيكالىق كومپانياسىنىڭ الماتىدا وكىلدىك اشۋ تۋرالى شەشىمىن قۇپتادى.

بۇدان بولەك، حالىقارالىق كۇن تارتىبىندەگى وزەكتى ماسەلەلەر تۋرالى پىكىر الماستى.

ايتا كەتەلىك مەملەكەت باسشىسى گەرمانيا بۋندەسراتىنىڭ پرەزيدەنتى انكە رەلينگەرمەن كەزدەسكەن ەدى.