پرەزيدەنت Stadler Kazakhstan زاۋىتىمەن تانىستى
استانا. KAZINFORM - مەملەكەت باسشىسىنا Stadler Kazakhstan زاۋىتى شىعارعان العاشقى جولاۋشىلار ۆاگونى تانىستىرىلدى. بۇل تۋرالى اقوردانىڭ باسپا ءسوز قىزمەتى حابارلادى.
جاڭا ۆاگونداردىڭ باستى ارتىقشىلىعى - جولاۋشىلاردىڭ جايلىلىعى مەن قاۋىپسىزدىگىن ارتتىرۋدى كوزدەيتىن زاماناۋي ينجەنەرلىك شەشىمدەر. قاتاڭ كليماتتىق جاعدايعا بەيىمدەلىپ جاسالعان ۆاگونداردى قولدانۋ مەرزىمى - 40 جىل.
كاسىپورىن كۋپە، پلاسكارت جانە قوزعالىسى قيىن جولاۋشىلار ءۇشىن ارناۋلى ۆاگوندار شىعارادى. بيىل 51 ۆاگوندى، ال 2030 -جىلعا دەيىن 557 جاڭا ۆاگوندى پايدالانۋعا بەرۋ جوسپارلانعان. بۇل ۇلتتىق تاسىمالداۋشىنىڭ ۆاگون پاركىن تولىعىمەن جاڭارتۋىنا مۇمكىندىك بەرەدى. ءوندىرىستى لوكاليزاتسيالاۋعا قازاقستاندىق كاسىپورىندار تارتىلعان.
پرەزيدەنت تەمىر جول سالاسىنىڭ جۇمىسشىلارىمەن اڭگىمەلەستى.
قاسىم-جومارت توقايەۆقا تەمىر جول قاتىناسى جۇيەسىن جاڭعىرتۋ بارىسى جونىندە ەسەپ بەرىلدى. بۇكىل ەل بويىنشا 125 ۆوكزالعا جوندەۋ جۇمىستارى جۇرگىزىلۋدە. حالىقارالىق سەرىكتەستەرمەن بىرلەسىپ، جولاۋشى تاسىمالداۋ جۇيەسىندەگى قىزمەت كورسەتۋ ساپاسىن ارتتىرۋعا جانە وڭىرلەردەگى كولىك بايلانىسىن جاقسارتۋعا باعىتتالعان شەشىمدەر ەنگىزىلىپ جاتىر.
اتاپ ايتقاندا، وتاندىق ءىت كومپانيالار جولاۋشىلارعا ارنالعان ءبىرىڭعاي سيفرلى پلاتفورما ازىرلەدى. بۇل بيلەت ساتىپ الۋدان باستاپ تۋريستىك قىزمەت كورسەتۋگە دەيىنگى كوپتەگەن فۋنكسيانى بىرىكتىرەدى. سونداي-اق پويىزدار سپۋتنيكتىك ينتەرنەتكە قوسىلادى. قاۋىپسىزدىكتى كۇشەيتۋ ماقساتىندا ۆيدەوتىركەۋلەر، موبيلدى تەرمينالدار، جاساندى ينتەللەكت تەحنولوگياسى نەگىزىندە مالىمەتتەردى تالداۋعا قابىلەتتى 4 مىڭ كامەرا پايدالانىلادى.
ەسكە سالا كەتەيىك، بۇعان دەيىن مەملەكەت باسشىسىنىڭ «داۋلەت» تەننيس ورتالىعىنا بارعانىن حابارلاعان ەدىك.