پرەزيدەنت سانيتاريالىق-ەپيدەميولوگيالىق ساراپتاما ورتالىعىنا باردى
قاسىم- جومارت توقايەۆ ق ر پرەزيدەنتى ءىس باسقارماسىنىڭ مەديتسينالىق ورتالىعىنا قاراستى سانيتاريالىق- ەپيدەميولوگيالىق ساراپتاما ورتالىعىنىڭ بيىل پايدالانۋعا بەرىلگەن جاڭا عيماراتىن ارالاپ كوردى، دەپ حابارلايدى Kazinform.
سانيتاريالىق- ەپيدەميولوگيالىق ساراپتاما ورتالىعىندا قورشاعان ورتا وبەكتىلەرىنە جانە تاماق ونىمدەرىنە باكتەريولوگيالىق، مولەكۋليارلىق- گەنەتيكالىق، پارازيتولوگيالىق، سانيتاريالىق- حيميالىق جانە توكسيكولوگيالىق، راديولوگيالىق زەرتتەۋ جۇمىستارى جۇرگىزىلەدى.
مەملەكەت باسشىسىنا ورتالىقتاعى زاماناۋي قۇرالدارمەن جابدىقتالعان جانە ەڭ جاڭا ادىستەمەلەردى پايدالانا وتىرىپ، جەدەل ءارى ناقتى ناتيجەلەردى الۋعا مۇمكىندىك بەرەتىن زەرتحانالار تانىستىرىلدى. وندا زاماناۋي اناليزاتورلارمەن بىرگە اگرەسسيۆتى- حيميالىق رەاكتيۆتەردى قاجەت ەتپەيتىن، ەكسپرەسس- ادىستەمەلەردى قولداناتىن پورتاتيۆتى زەرتحانالىق قۇرىلعىلار ورناتىلعان. بۇل زەرتتەۋ ۋاقىتىن ەداۋىر قىسقارتىپ قانا قويماي، قارجىنى دا ۇنەمدەيدى.
قازاقستان رەسپۋبليكاسى پرەزيدەنتىنىڭ ءىس باسقارماسى مەديتسينالىق ورتالىعىنىڭ باسشىسى الەكسەي تسويدىڭ ايتۋىنشا، سانيتاريالىق- ەپيدەميالىق ساراپتاما ورتالىعىندا 8 زەرتحانا جۇمىس ىستەيدى. الداعى ۋاقىتتا زەرتتەۋلەر نومەنكلاتۋراسىن جىلىنا 2000 عا دەيىن كەڭەيتۋ كوزدەلىپ وتىر.
سونىمەن قاتار زەرتتەۋلەردىڭ جاڭا تۇرلەرىن، حالىقارالىق ساپا جانە قۇزىرەتتىلىك ستاندارتتارىن ەنگىزۋ ناتيجەسىندە ورتالىق رەفەرەنس زەرتحانا مارتەبەسىنە يە بولا الادى. ياعني، باسقا زەرتحانالارداعى كۇمان تۋدىرعان زەرتتەۋلەردىڭ دۇرىستىعى مەن دالدىگىن وسى جەردە ناقتى تەكسەرۋگە بولادى.
قاسىم-جومارت توقايەۆ ءوز مىندەتتەرىن ۇلكەن جاۋاپكەرشىلىكپەن اتقارىپ جۇرگەن ماماندارعا العىس ايتىپ، جاڭا ساراپتاما ورتالىعى ەل يگىلىگىنە قىزمەت ەتەتىنىنە سەنىم ءبىلدىردى.
سونىمەن قاتار مەملەكەت باسشىسى مەديتسينالىق ورتالىقتىڭ قوعامدىق دەنساۋلىق ساقتاۋ ىسىنە قوسقان ۇلەسى مەن ستراتەگيالىق ماڭىزى زور ەكەنىن اتاپ ءوتتى.