پرەزيدەنت S Sistem Lojistik كومپانياسىنىڭ باسقارما توراعاسىمەن كەزدەستى
استانا. KAZINFORM - قاسىم-جومارت توقايەۆ S Sistem Lojistik كومپانياسىنىڭ باسقارما ءتوراعاسى حۋسەين ءبارليندى قابىلدادى. بۇل تۋرالى اقوردانىڭ باسپا ءسوز قىزمەتى حابارلادى.
كەزدەسۋ بارىسىندا كومپانيامەن لوگيستيكا سالاسىندا ءوزارا ءتيىمدى ءارى ۇزاق مەرزىمدى سەرىكتەستىك ورناتۋ پەرسپەكتيۆاسى تالقىلاندى. مەملەكەت باسشىسى ەلىمىزدى ەۋرازياداعى جەتەكشى ترانزيتتىك حابقا اينالدىرۋ ءۇشىن ورتا ءدالىزدى جان-جاقتى دامىتۋ جۇمىستارى باستالعانىن جەتكىزدى.
بۇل رەتتە قاسىم-جومارت توقايەۆ S Sistem Lojistik كومپانياسىنىڭ اقتوبە حالىقارالىق اۋەجايىندا لوگيستيكا ورتالىعىن قۇرۋ باستاماسىنا قولداۋ ءبىلدىردى. جوبا «قازپوشتا» اكسيونەرلىك قوعامىمەن بىرگە جۇزەگە اسىرىلادى.
حۋسەين بارلين جوبا اياسىندا اتقارىلىپ جاتقان جۇمىستار تۋرالى باياندادى. سونداي-اق كومپانيانىڭ الداعى ۋاقىتتا استانا، الماتى، شىمكەنت جانە اقتاۋ قالالارىندا دا لوگيستيكا ورتالىعىن كەڭەيتۋدى جوسپارلاپ وتىرعانىن جەتكىزدى.
قاسىم-جومارت توقايەۆتىڭ ايتۋىنشا، لوگيستيكا ينفراقۇرىلىمىن كەشەندى تۇردە دامىتۋ وتە ماڭىزدى. مۇنىڭ ءبارى ترانزيت ۋاقىتىن قىسقارتۋعا جانە ەكسپورت ينفراقۇرىلىمىن جاقسارتۋعا مۇمكىندىك بەرەدى.
S Sistem Lojistik - تۇركيانىڭ لوگيستيكا سەكتورىنداعى جەتەكشى يننوۆاتسيالىق ۇيىم. كومپانيا ىستانبۇل، انكارا، يزمير جانە انتاليا اۋەجايلارىندا، سونداي-اق باسقا دا جەرلەردە جالپى اۋماعى 100 مىڭ شارشى مەتر قويما جەلىسىن باسقارادى.
بۇعان دەيىن مەملەكەت باسشىسىنىڭ YDA Holding باسقارما ءتوراعاسى حۋسەين ارسلاندى قابىلداعانىن جازعان ەدىك.