پرەزيدەنت رەزيدەنتسياسىنىڭ ورنىنداعى جاڭا ساياباق قانداي بولادى

الماتى. KAZINFORM - الماتىدا پرەزيدەنت رەزيدەنتسياسىنىڭ ورنىنداعى جاڭا ساياباقتا ينجەنەرلىك جەلىلەردى جۇرگىزۋگە 940 ميلليون تەڭگە ءبولىندى. بۇل تۋرالى الماتى قالاسىنىڭ اكىمدىگى Kazinform اگەنتتىگى جولداعان ساۋالعا بەرگەن جاۋابىندا مالىمدەدى.

جوبا «نازاربايەۆ داڭعىلىنىڭ باتىسى مەن گاندي كوشەسىنىڭ سولتۇستىگىندەگى اۋماقتى اباتتاندىرۋ» دەپ اتالادى.

- نازاربايەۆ داڭعىلىنىڭ باتىسى مەن گاندي كوشەسىنىڭ سولتۇستىگىندە ورنالاسقان 4,16 گەكتار اۋماقتا زاماناۋي جانە جايلى سكۆەر سالۋ جوسپارلانىپ وتىر. جوبانى جۇزەگە اسىرۋ ەكى كەزەڭگە بولىنگەن: سكۆەردىڭ نەگىزگى بولىگىن سالۋ جانە ينفراقۇرىلىمدى دامىتۋ، - دەپ حابارلادى قالا اكىمدىگىنەن.

مەگاپوليس باسشىلىعىنىڭ مالىمەتىنشە، جوبا ينكليۋزيۆتىلىك پەن قولجەتىمدىلىك تالاپتارىنا ساي ازىرلەنگەن - ساياباق بارلىق جاستاعى جانە قوزعالىسى شەكتەۋلى تۇرعىنداردىڭ قاجەتتىلىكتەرىن ەسكەرە وتىرىپ سالىنادى.

- ساياباق تولىقتاي اباتتاندىرىلادى: توعان مەن سۋ تازارتۋ جۇيەسى، سىرتقى جارىقتاندىرۋ، ينجەنەرلىك جەلىلەر جانە اۋماقتى كەڭ كولەمدى كوگالداندىرۋ قاراستىرىلعان. قىس مەزگىلىندە مۇز ايدىنى جۇمىس ىستەيدى، - دەلىنگەن اكىمدىكتىڭ جاۋابىندا.

تەحنيكالىق قاداعالاۋ قىزمەتىنە قاتىستى مەملەكەتتىك ساتىپ الۋ پورتالىندا جاريالانعان حابارلاماعا سايكەس، جاڭا ساياباقتىڭ استىندا جەراستى اۆتوتۇراق سالۋ دا جوسپارلانعان.

سونىمەن قاتار اكىمدىك جاۋابىنا سايكەس، قازىرگى ۋاقىتتا دايىندىق جۇمىستارى اياقتالىپ، بۇرعىلاۋ جانە قۇرىلىمداردى بەكىتۋ جۇمىستارى ءجۇرىپ جاتىر.

- بارلىق جۇمىس بەكىتىلگەن مەرزىمگە سايكەس جانە جوسپار بويىنشا ءجۇرىپ جاتىر. قۇرىلىس- مونتاجداۋ جۇمىستارى 2025-جىلدىڭ اقپان ايىندا باستالدى، اياقتالۋى وسى جىلعا جوسپارلانعان. ينجەنەرلىك جەلىلەردى جۇرگىزۋگە جەرگىلىكتى بيۋدجەتتەن 940 ميلليون تەڭگە قاراستىرىلعان، ال قۇرىلىس- مونتاجداۋ جۇمىستارىن دەمەۋشىلەر قاراجىلاندىردى، - دەلىنگەن اكىمدىك جاۋابىندا.

ودان بولەك جوبا اياسىندا 1500 دەن استام جاسىل جەلەك وتىرعىزۋ كوزدەلگەن. ولاردىڭ قاتارىندا قىلقان جاپىراقتى جانە ءىرى كولەمدى 150 اعاش بار.

جىل باسىندا الماتىدا پرەزيدەنت رەزيدەنتسياسىنىڭ ورنىنداعى ساياباق قاشان اشىلاتىنىن جازعانبىز.

ەسكە سالايىق، 2022-جىلى 5-قاڭتار كۇنى پرەزيدەنت رەزيدەنتسياسىن ءبىر توپ ادام باسىپ الىپ، ورتەپ جىبەردى. سوندىقتان مەملەكەت باسشىسىنىڭ شەشىمىمەن بۇل عيمارات ءسۇرىلىپ، ونىڭ ورنىنا ساياباق سالىناتىنى حابارلاندى.

كەيىن ماماندار الماتىداعى پرەزيدەنت رەزيدەنتسياسى نەلىكتەن سۇرىلەتىنىن ءتۇسىندىردى.

2022-جىلى ناۋرىز ايىندا الماتىداعى پرەزيدەنت رەزيدەنتسياسى تاريحي ەسكەرتكىشتەر تىزىمىنەن الىنىپ تاستالدى.

2022 -جىلى قازان ايىندا الماتى اكىمى ەربولات دوسايەۆ پرەزيدەنت رەزيدەنتسياسىن ءسۇرۋ جۇمىستارى ءىس جۇزىندە اياقتالعانىن ايتتى.