پرەزيدەنت رودينا اۋىلىن ارالاپ كوردى
استانا. KAZINFORM - مەملەكەت باسشىسىنىڭ اقمولا وبلىسىنا جۇمىس ساپارى تسەلينوگراد اۋدانىنداعى رودينا اۋىلىندا جالعاستى.
قاسىم-جومارت توقايەۆ اۋىلداعى مادەنيەت ءۇيىن ارالادى.
جالپى اۋدانى 1563 شارشى مەتردى قۇرايتىن نىساندا حورەگرافيا جانە سپورت زالدارى، دىبىس جازۋ ستۋدياسى مەن ۇيىرمەلەرگە ارنالعان كابينەتتەر بار. مادەنيەت مەكەمەسىنىڭ جانىنان ءتۇرلى شىعارماشىلىق ۇجىمدار قۇرىلعان. سونىمەن قاتار بىرنەشە سپورت ۇيىرمەسى جۇمىس ىستەيدى. ولارعا 400 دەن استام اۋىل تۇرعىنى قاتىسادى.
پرەزيدەنتكە «رودينا» اگروفيرماسىنىڭ باس ديرەكتورى يۆان ساۋەر سەرىكتەستىكتىڭ اۋىلدا ىسكە اسىرىپ جاتقان الەۋمەتتىك جوبالارىن تانىستىردى. بىلتىر بيزنەستىڭ الەۋمەتتىك جاۋاپكەرشىلىگى اياسىندا كومپانيا رودينا اۋىلىنىڭ يگىلىگىنە 791 ميلليون تەڭگە قارجى بولگەن.
مەملەكەت باسشىسى مادەنيەت ءۇيى ونەرپازدارىنىڭ «دوستىق شۋاعى» كومپوزيتسياسىن تاماشالاپ، اۋىل تۇرعىندارىمەن جۇزدەستى
- سىزدەرمەن كەزدەسكەنىمە قۋانىشتىمىن. اۋىلعا ارنايى كەلدىم. قۇرمەتتى يۆان اداموۆيچ ءساۋەردىڭ شارۋاشىلىعى جايىندا بۇعان دەيىن كوپ ەستىگەن بولاتىنمىن. ءبىراق مۇندا كەلىپ، اۋىلدىڭ تىنىس- تىرشىلىگىمەن تانىسۋدىڭ رەتى بولماي ءجۇر ەدى. بۇل - وتە ۇلكەن ءارى بارلىق كورسەتكىش بويىنشا ۇزدىك شارۋاشىلىق. بارشاڭىزعا باق-بەرەكە تىلەيمىن، - دەدى قاسىم- جومارت توقايەۆ.
سونىمەن قاتار پرەزيدەنت رودينا اۋىلىنىڭ «ناشا رودينا» سۋپەرماركەتىن، «دوستىق» ساياباعى مەن جالپى ءبىلىم بەرەتىن مەكتەبىن ارالاپ كوردى.