پرەزيدەنت پرەمەر-مينيستر ولجاس بەكتەنوۆتى قابىلدادى

استانا. KAZINFORM - قاسىم-جومارت توقايەۆقا ەلىمىزدىڭ الەۋمەتتىك-ەكونوميكالىق دامۋ كورسەتكىشتەرى، ەگىن وراعى جانە جىلىتۋ ماۋسىمىنا دايىندىق بارىسى تۋرالى اقپارات بەرىلدى.

ولجاس بەكتەنوۆتىڭ ايتۋىنشا، بيىلعى قاڭتار-تامىز ايلارى ارالىعىندا ەكونوميكانىڭ ءوسىمى 3,7 پايىزدى قۇرادى. اتاپ ايتقاندا، قۇرىلىس (%8,8)، كولىك جانە قويما ءىسى (%7,9)، بايلانىس (%7,4)، ساۋدا (%5,5)، وڭدەۋ ونەركاسىبى (%4,9) سەكتورلارىنداعى كورسەتكىش ەداۋىر جاقسارعان.

اۋىل شارۋاشىلىعىن جەڭىلدىكپەن قارجىلاندىرۋ كولەمى 3 ەسە ۇلعايىپ، 580 ميلليارد تەڭگەگە جەتتى. بۇگىندە ەلىمىز بويىنشا ءداندى جانە بۇرشاقتى داقىلدار القابىنىڭ 70,2 پايىزى جينالىپ، 17,2 ميلليون توننا استىق باستىرىلدى. ديقاندار ارزان جانار-جاعارمايمەن جەتكىلىكتى مولشەردە قامتاماسىز ەتىلدى.

مەملەكەت باسشىسىنا بارلىق وڭىردە الداعى جىلىتۋ ماۋسىمىنا دايىندىق جۇمىستارى جۇرگىزىلىپ جاتقانى جونىندە باياندالدى. الەۋمەتتىك نىسانداردىڭ دايىندىعى جوعارى دەڭگەيدە. تۇرعىن ۇيلەردىڭ جىلىتۋ ماۋسىمىنا ازىرلىگى بويىنشا جۇمىس 98,3 پايىزعا ورىندالدى. ەلەكتر ستانسيالارىنا جىل سايىن 60 ميلليون توننا كومىر قاجەت. قازىر ونىڭ قاجەتتى قورى بار.

قاسىم-جومارت توقايەۆقا سۋ تاسقىنى سالدارىن جويۋ جونىندەگى بۇعان دەيىن بەرىلگەن تاپسىرمالارىنىڭ ورىندالۋ بارىسى مەن كەلەسى جىلى سۋ تاسقىنى جاعدايىنىڭ الدىن الۋ شارالارى تۋرالى ايتىلدى. زارداپ شەككەندەردىڭ بارلىعىنا الەۋمەتتىك قولداۋ كورسەتىلىپ، بۇلىنگەن دۇنيە- مۇلكى ءۇشىن وتەماقى تولەندى. باسپاناسىنان ايىرىلعاندارعا 5767 تۇرعىن ءۇي ساتىپ الىندى جانە 2576 جاڭا ءۇي سالىندى. اقمولا مەن باتىس قازاقستان وبلىستارىنداعى 104 نىساندا جۇمىس اياقتالۋعا جاقىن. سۋ تاسقىنىنا قارسى ءىس-شارالار جوسپارى جۇزەگە اسىرىلىپ جاتىر.

كەزدەسۋ سوڭىندا مەملەكەت باسشىسى ەلىمىزدىڭ ونەركاسىپ الەۋەتىن ودان ءارى ارتتىرۋ جانە ينفراقۇرىلىمدى جاڭعىرتۋ جونىندە ءبىرقاتار تاپسىرما بەردى.