پرەزيدەنت پرەمەر-مينيستر ولجاس بەكتەنوۆتى قابىلدادى

استانا. KAZINFORM - قاسىم-جومارت توقايەۆقا 2024-جىلدىڭ ءۇشىنشى توقسانىنداعى الەۋمەتتىك-ەكونوميكالىق دامۋ كورسەتكىشتەرى تۋرالى باياندالدى.

مەملەكەت باسشىسىنىڭ تاپسىرمالارىن جۇزەگە اسىرۋ اياسىندا ەكونوميكانى ءارتاراپتاندىرۋ شارالارى كۇشەيتىلگەن. ەسەپتى كەزەڭدە شيكىزاتتىق ەمەس سەكتوردى دامىتۋ ناتيجەسىندە ىشكى جالپى ءونىمنىڭ ءوسىمى 4 پايىزدى قۇرادى. ەڭ جوعارى ءوسىمدى اۋىل شارۋاشىلىعى (11,4 پايىز)، قۇرىلىس (10,1 پايىز)، كولىك (8 پايىز)، بايلانىس (6,4 پايىز)، ساۋدا (6,3 پايىز)، وڭدەۋ ونەركاسىبى (4,8 پايىز) سالالارى كورسەتكەن. 14 وڭىردە وڭدەۋ ونەركاسىبىندەگى ءوندىرىس كولەمى ارتقان.

بيىلعى قاڭتار-تامىز ايلارىندا سىرتقى تاۋار اينالىمى 91,7 ميلليارد دوللاردى قۇرادى، ونىڭ ىشىندە ەكسپورتتىڭ ۇلەسى 3,3 پايىزعا كوبەيدى. وڭ ساۋدا بالانسى 34,8 پايىزعا ءوسىپ، 15,4 ميلليارد دوللارعا جەتتى.

قاسىم-جومارت توقايەۆقا ەل بيۋدجەتىنە 14,9 تريلليون تەڭگە تۇسكەنى تۋرالى مالىمەت بەرىلدى. الەۋمەتتىك تولەمدەر بيۋجەت شىعىسىنىڭ نەگىزگى بولىگىن قۇرايدى.

سونىمەن قاتار مەملەكەت باسشىسىنا زاڭسىز يەلەنگەن اكتيۆتەردى قايتارۋ جونىندەگى تاپسىرمالارىنىڭ ورىندالۋ بارىسى جايىندا ايتىلدى. جىل باسىنان بەرى كوميسسيا 450 ميلليارد تەڭگەگە جۋىق اكتيۆتەردى قايتارۋ جونىندەگى كەلىسىمدەردى ماقۇلداعان. بۇگىندە مەملەكەتكە 265 ميلليارد تەڭگەنى قۇرايتىن اكتيۆتەر، سونىڭ ىشىندە اقشالاي 177 ميلليارد تەڭگە قايتارىلدى. بارلىق قايتارىلعان قاراجات الەۋمەتتىك ماڭىزى زور جوبالارعا جۇمسالىپ جاتىر. «زاڭسىز يەمدەنىلگەن اكتيۆتەردى مەملەكەتكە قايتارۋ تۋرالى» زاڭنىڭ سۋبەكتىلەرى ءبىرقاتار جوبالاردى، اتاپ ايتقاندا، مۇقتاج ادامداردى وڭالتۋ جانە الەۋمەتتەندىرۋ باعدارلامالارىن، مادەني-ءبىلىم بەرۋ ورتالىعى مەن سپورت قۇرىلىسىن قارجىلاندىرۋدى باستادى.

قاسىم-جومارت توقايەۆقا يسلامابادتا وتكەن شاڭحاي ىنتىماقتاستىق ۇيىمىنا مۇشە مەملەكەتتەردىڭ ۇكىمەت باسشىلارى كەڭەسى وتىرىسىنىڭ قورىتىندىسى جونىندە باياندالدى.

پرەزيدەنت ۇكىمەتتىڭ جۇمىسىن جانداندىرۋ قاجەت ەكەنىن اتاپ ءوتتى. بۇل رەتتە ەل ەكونوميكاسىن ءارتاراپتاندىرۋ ارقىلى ونىڭ تۇراقتى ءوسىمىن قامتاماسىز ەتۋ، شاعىن جانە ورتا بيزنەستى قولداۋ، اگروونەركاسىپ كەشەنىندە يننوۆاتسيانى دامىتۋ، ءىرى يندۋستريالدىق جانە ينفراقۇرىلىمدىق جوبالاردى جۇزەگە اسىرۋ شارالارىن جالعاستىرۋدى تاپسىردى.