پرەزيدەنت قىتاي باسشىسىمەن كەزدەسكەندە نەگە اراكىدىك قىتايشا سويلەسىپ كەتەتىنىن ايتتى

  استانا. KAZINFORM - پرەزيدەنت قاسىم-جومارت توقايەۆ قىتاي حالىق رەسپۋبليكاسىنىڭ ءتوراعاسى شي جينپيڭنىڭ قازاقستانداعى ساپارى قارساڭىندا شينحۋا اگەنتتىگىنە بەرگەن سۇحباتىندا قىتايداعى ستۋدەنتتىك شاعىن جىلى لەبىزبەن ەسكە الدى.

«شىنىمەن دە كەيدە اڭگىمە اراسىندا ارىپتەسىمە اسا ماڭىزدى ماسەلەلەر تۋرالى ويىمدى بارىنشا ناقتى جەتكىزۋ ءۇشىن نەمەسە كۇندەلىكتى ءومىردىڭ قىزىقتى تاقىرىپتارىن تالقىلاۋ ءۇشىن قىتاي تىلىنە اۋىسىپ جاتامىن. مەنىڭ ستۋدەنتتىك ءومىرىنىڭ ەڭ ءبىر جارقىن ساتتەرى مەن ديپلومات رەتىندەگى مانسابىمنىڭ باستاۋى قىتايمەن بايلانىستى. جالپى ەسەپتەگەندە مەن قىتايدا 8 جىل ءومىر ءسۇردىم. وسى ۋاقىت ىشىندە مەن قىتاي مادەنيەتىنە، تاريحىنا، ءتىلى مەن داستۇرىنە تەرەڭ بويلاپ، قىتاي اسحاناسىنىڭ باي مۇراسى مەن الۋاندىعىن تانىدىم»، - دەدى قاسىم-جومارت توقايەۆ.

پرەزيدەنت ەكى ەل باسشىلارىنىڭ جەكە تانىستىعى اراداعى ارىپتەستىكتىڭ تەرەڭدەتۋگە ىقپالىن تيگىزىپ جاتقانىن دا ايتتى.

«مەن كەيىنگى جىلدارى قىتايعا ءۇش رەت ساپارلاپ قايتتىم. ونىڭ ىشىندە «ورتالىق ازيا - قىتاي» سامميتى / 2023 -جىلدىڭ مامىر ايى، شيان ق./، «ءبىر بەلدەۋ، ءبىر جول» ءۇشىنشى جوعارى فورۋمى /2023 -جىلدىڭ قازان ايى، بەيجىڭ/، باوداعى ازيا فورۋمى /2024 -جىلدىڭ ناۋرىز ايى، حاينان پروۆ./ سياقتى ماڭىزدى شارالار دا بار. جەكە بايلانىستاردىڭ ارىپتەستىگىمىزدى تەرەڭدەتۋگە جانە ەكى مەملەكەتتىڭ قارىم- قاتىناسىندا جاڭا كوكجيەكتەر اشۋعا سەرپىن بەرەتىنى ءسوزسىز. وسى جىلداردا ەكى ارادا قالىپتاسقان دوستىق پەن سەنىمگە قۇرىلعان قارىم-قاتىناس جاڭا ۇلكەن ماقساتتارعا قول جەتكىزۋگە مۇمكىندىك اشادى»، - دەدى مەملەكەت باسشىسى.