پرەزيدەنت قىرعىزستان رەسپۋبليكاسىنا جۇمىس ساپارىمەن باردى
پرەزيدەنت قاسىم-جومارت توقايەۆ ت م د-عا مۇشە ەلدەردىڭ مەملەكەتتەر باسشىلارى كەڭەسىنىڭ وتىرىسىنا قاتىسۋ ءۇشىن قىرعىزستان رەسپۋبليكاسىنا جۇمىس ساپارىمەن باردى، دەپ حابارلايدى Kazinform.
«مەملەكەت باسشىسىن بىشكەك حالىقارالىق اۋەجايىنان قىرعىزستان مينيسترلەر كابينەتىنىڭ ءتوراعاسى - قىرعىزستان پرەزيدەنتى اكىمشىلىگىنىڭ باسشىسى اقىلبەك جاپاروۆ قارسى الدى»، - دەپ جازدى اقوردا جەلىدەگى رەسمي پاراقشاسىندا.
ايتا كەتەيىك، بىشكەكتە وتەتىن ت م د سامميتىنە ت م د ەلدەرىنىڭ باسشىلارى قاتىسادى.
13-قازاندا بىشكەكتە «الا-ارشا» مەملەكەتتىك رەزيدەنتسياسىندا قىرعىز تاراپىنىڭ توراعالىعىمەن، قازاقستان پرەزيدەنتى قاسىم-جومارت توقايەۆتىڭ قاتىسۋىمەن ت م د مەملەكەتتەرى باسشىلارى كەڭەسىنىڭ كەزەكتى وتىرىسى وتەدى.
كەزدەسۋ بارىسىندا دوستاستىققا مۇشە مەملەكەتتەردىڭ ساۋدا- ەكونوميكالىق جانە مادەني- گۋمانيتارلىق سالالارداعى ىنتىماقتاستىعىن كەڭەيتۋ جانە نىعايتۋعا باعىتتالعان ماڭىزدى شەشىمدەر قابىلدانادى.
ت م د مەملەكەت باسشىلارى سامميتىنە قاتىسۋ ءۇشىن بىشكەككە رەسەي پرەزيدەنتى ۆلاديمير پۋتين، ازەربايجان پرەزيدەنتى يلحام اليەۆ، بەلارۋس پرەزيدەنتى الەكساندر لۋكاشەنكو، تۇركىمەنستان پرەزيدەنتى سەردار بەردىمۇحامەدوۆ، تاجىكستان پرەزيدەنتى ەمومالي راحمون، وزبەكستان پرەزيدەنتى شاۆكات ميرزيەيەۆ كەلدى. باسقوسۋعا قاسىم-جومارت توقايەۆ تا قاتىسادى دەپ جوسپارلانۋدا.
قىرعىز رەسپۋبليكاسى پرەزيدەنتىنىڭ باسپا ءسوز قىزمەتىنىڭ حابارلاۋىنشا، ارمەنيا پرەمەر-ءمينيسترى نيكول پاشينيان سامميتكە قاتىسا المايدى. بۇل تۋرالى 10-قازان كۇنى قىرعىز رەسپۋبليكاسىنىڭ پرەزيدەنتى سادىر جاپاروۆپەن تەلەفون ارقىلى سويلەسۋ بارىسىندا بەلگىلى بولدى.