پرەزيدەنت: قوي جۇنىنەن دە تىڭايتقىش الۋعا بولادى

استانا. KAZINFORM - مەملەكەت باسشىسى قاسىم-جومارت توقايەۆ اۋىل شارۋاشىلىعى قىزمەتكەرلەرىنىڭ ءبىرىنشى فورۋمىندا ەلدەگى تىڭايتقىش ءوندىرىسىنىڭ كولەمىن جىلىنا 7 ميلليون تونناعا دەيىن جەتكىزۋ جوسپاردا بار ەكەنىن ايتتى.

«بىزدە مينەرالدى تىڭايتقىشتار از قولدانىلادى. بۇل - وتاندىق اگروسەكتورداعى وزەكتى ماسەلە. بيىل ەگىس القاپتارىنا بۇرىنعىدان ەكى ەسە كوپ تىڭايتقىش سەبىلدى. بۇل - عىلىمي تۇرعىدان قاجەت تىڭايتقىشتىڭ 41 پايىزى دەگەن ءسوز. جالپى جۇمىس قارقىنى جامان ەمەس. ءبىراق ءبىز اگروتەحنولوگياسى دامىعان وزىق ەلدەردىڭ دەڭگەيىنە ۇمتىلۋىمىز قاجەت. سوندىقتان يمپورتقا تاۋەلدى بولۋدى ازايتۋ كەرەك. وزىمىزدە شىعارىلاتىن تىڭايتقىشتار اۋىل شارۋاشىلىعىن تولىق قامتاماسىز ەتپەيدى، سۇرانىستىڭ جارتىسىن عانا وتەيدى»، - دەدى قاسىم-جومارت توقايەۆ.

مەملەكەت باسشىسى ەلىمىزدە قۇنى 4 ميلليارد دوللار بولاتىن اۋقىمدى ينۆەستيتسيالىق جوبالار جۇزەگە اسىرىلىپ جاتقانىن ەسكە سالدى.

«سونىڭ ارقاسىندا 7 ميلليون توننا مينەرالدى تىڭايتقىش وندىرىلمەك. وسىلايشا ءبىز ىشكى نارىقتى تولىق قامتاماسىز ەتەمىز، ال ارتىعىن ەكسپورتقا شىعارۋعا مۇمكىندىك تۋادى. بۇدان بولەك ورگانيكالىق تىڭايتقىش ءوندىرىسىن دامىتۋ ماڭىزدى. حالىقارالىق تاجىريبەگە قاراساق، قويدىڭ ءجۇنىن سۋارمالى جەرگە تىڭايتقىش رەتىندە ءتيىمدى پايدالانۋعا بولادى»، - دەدى قاسىم-جومارت توقايەۆ.

اۋىل شارۋاشىلىعىنىڭ ەكسپورتتىق الەۋەتىن كۇشەيتۋ قاجەت.

«اۋىل شارۋاشىلىعىنىڭ ەكسپورتتىق الەۋەتىن كۇشەيتۋ قاجەت. مۇندا كولىك- لوگيستيكا مۇمكىندىكتەرىنىڭ شەكتەۋلى بولۋى كەدەرگى كەلتىرەدى. مىسالى، ەلىمىزدەگى لوگيستيكا مەن ساقتاۋ جۇيەلەرىنىڭ جەتكىلىكتى بولماۋىنان اۋىل شارۋاشىلىعى تاۋارىن وندىرۋشىلەر زور شىعىنعا ۇشىراپ وتىر. سوندىقتان ساقتاۋ ينفراقۇرىلىمىن، سونىڭ ىشىندە ەليەۆاتورلار، كوكونىس جانە جەمىس-جيدەك ساقتاۋ قويمالارىن دامىتۋ ماڭىزدى باعىت بولۋعا ءتيىس. سىيىمدىلىعى 700 مىڭ توننا بولاتىن قويمالار سالۋ مەن جاڭعىرتۋدىڭ كەشەندى جوسپارى قابىلداندى. بۇل جۇمىستى ۇدايى باقىلاۋدا ۇستاۋ كەرەك. ءبىز ءداستۇرلى وتكىزۋ نارىقتارىن ساقتاپ قانا قويماي، ءتۇرلى ەلدەردىڭ تالاپتارىنا بەيىمدەلگەن يكەمدى جەتكىزۋ جۇيەسىن قۇرا وتىرىپ، ەكسپورتتى ءارتاراپتاندىرعانىمىز ءجون»، - دەدى قاسىم-جومارت توقايەۆ.

مەملەكەت باسشىسىنىڭ اتاپ وتۋىنشە، وزبەكستان، ازەربايجان، تۇرىكمەنستان، قىرعىزستان جانە اۋعانستانعا جوسپارلى تۇردە استىق تاسىمالداۋ جۇمىسى باستالدى.

«يران نارىعىنا كىرۋگە رۇقسات الىپ، 250 مىڭ توننا ارپا جونەلتتىك. سونداي-اق قىتايعا، ەۋروپا وداعى ەلدەرىنە جانە سولتۇستىك افريكاعا استىق جەتكىزىلەدى. تەڭىزبەن تاسىمالداۋدى ارتتىرۋ ءۇشىن قۇرىق پورتىندا جاڭا استىق تەرمينالى ىسكە قوسىلدى. جاڭا نارىقتاردىڭ ازىق-تۇلىككە سۇرانىس كولەمى ۇلعايىپ كەلە جاتقانىن ەسكەرسەك، سولتۇستىك - وڭتۇستىك جانە ترانسكاسپي باعىتى سياقتى حالىقارالىق دالىزدەردىڭ ءرولى ارتا تۇسەدى. قازاقستاندى ەۋرازيانىڭ نەگىزگى كولىك- لوگيستيكالىق ورتالىعى رەتىندە قۇرۋ جونىندەگى ستراتەگيالىق مىندەت - مەنىڭ كەيىنگى جىلدارداعى حالىقارالىق دەڭگەيدە جۇرگىزىپ جاتقان كەلىسسوزدەرىمنىڭ باستى تاقىرىبىنا اينالدى. بۇل ماسەلەدە اتالعان دالىزدەرگە ىڭعايلى جول تابۋ جانە ىشكى لوگيستيكانى جاقسارتۋ وتە ماڭىزدى. سوندىقتان الداعى التى جىلدا ءبىز تەمىرجول جەلىسىن اۋقىمدى تۇردە جاڭعىرتۋدى كوزدەپ وتىرمىز. ون ءبىر مىڭ شاقىرىم تەمىر جولدى جوندەپ، بەس مىڭ شاقىرىمنان استام جاڭا تەمىر جول سالۋ جوسپارلانۋدا»، - دەدى پرەزيدەنت.

قاسىم-جومارت توقايەۆ قازىردىڭ وزىندە «داربازا -ماقتاارال»، «دوستىق - مويىنتى»، «باقتى - اياگوز» جانە «الماتى قالاسىنىڭ اينالما جولى» سياقتى ءىرى جوبالار جۇزەگە اسىرىلىپ جاتقانىن ايتتى.

«بۇل ورتالىق ازيا مەن قىتاي باعىتىنداعى جۇك تاسىمالىنىڭ ارتۋىنا جول اشادى. اۆتوكولىك جولدارىنىڭ جەلىسىن دامىتۋ باعىتىندا اۋقىمدى جۇمىستار اتقارىلۋدا. ماسەلەن، جىل سوڭىنا دەيىن «استانا - بالقاش – الماتى»، «تالدىقورعان – وسكەمەن»، «قتوبە – قاندىاعاش» جانە «اتىراۋ – استراحان» اۆتوموبيل جولدارىنىڭ قۇرىلىسى اياقتالادى»، - دەدى مەملەكەت باسشىسى.

اۆتور

مارلان جيەمباي