پرەزيدەنت قولىنان ماراپات العان ۇستاز نەگە جىلادى

تۇركىستان. KAZINFORM - مەملەكەت باسشىسىنان ماراپات العان تۇركىستاندىق ۇستازدىڭ ەبىل-دەبىل جىلاعان ۆيدەوسى الەۋمەتتىك جەلىدە كەڭىنەن تاراپ كەتتى. 58 جاستاعى اعىلشىن ءتىلى ءپانىنىڭ مۇعالىمى ابيبۋللا جاكۋدايەۆ قۋانىشتان كوڭىلى بوساعاندىقتان قاسىنداعى ارىپتەستەرىن قۇشاقتاپ العان.

وقيعا 5-قازان كۇنى بولدى. ق ر پرەزيدەنتى قاسىم-جومارت توقايەۆ ۇزدىك ۇستازداردى قابىلداپ، مەملەكەتتىك ناگرادا تابىستاعان بولاتىن. سولاردىڭ قاتارىندا تۇركىستان وبلىسى ورداباسى اۋدانىندا ورنالاسقان ش. ءۋاليحانوۆ اتىنداعى مەكتەپ-گيمنازيانىڭ مۇعالىمى ابيبۋللا جاكۋدايەۆ تا بار.

مەملەكەت باسشىسىنىڭ قولىنان «قازاقستاننىڭ ەڭبەك سىڭىرگەن ۇستازى» توسبەلگىسىن العان مۇعالىم ەسىكتەن شىعاردا ءوزىن-ءوزى توقتاتا الماي كوز جاسىنا ەرىك بەردى.

بۇگىن Kazinform ءتىلشىسى ابيبۋللا جاكۋدايەۆقا حابارلاسىپ، ماراپاتىمەن قۇتتىقتادى. سونداي-اق، سالتاناتتى جيىننان العان اسەرىن سۇرادى.

«بۇل - قۋانىشتىڭ كوز جاسى. سونداي-اق، مەن الدىندا مەملەكەت باسشىسىنىڭ العىس حاتىن العانمىن. ەڭبەكتىڭ باعالانعانى ەڭ ۇلكەن ابىروي عوي. قانشاما رەت مەملەكەتتىك ناگراداعا ۇسىنىلعانىممەن جولىم بولماپ ەدى. ياعني، جولىمدى كەسۋشىلەر كوپ بولدى. ال، بۇگىن ەڭبەگىم جوعارى باعالانىپ وتىر. سول سەبەپتى بۇل قۋانىشتىڭ كوز جاسى»، - دەدى ۇستاز.

ابيبۋللا جاكۋدايەۆ ش. ءۋاليحانوۆ اتىنداعى مەكتەپ-گيمنازيادا 1983-جىلدان بەرى قىزمەت اتقارىپ كەلەدى.

«پەداگوگ-شەبەر» ساناتىنداعى ىزدەنىمپاز، شىعارماشىل، جاڭاشىل ۇستازدىڭ جالپى پەداگوگيكالىق ءوتىلى - 40 جىل 8 اي.

بۇگىنگە دەيىن مەملەكەت باسشىسىنىڭ العىس حاتىمەن، «قازاقستان ءبىلىم بەرۋ ءىسىنىڭ قۇرمەتتى قىزمەتكەرى»، «ىبىراي التىنسارين» توسبەلگىلەرىمەن جانە «قۇرمەت» گراموتاسىمەن ماراپاتتالعان.

ال، جەلىدە تاراعان ۆيدەوعا پىكىر جازۋشىلاردىڭ كوزقاراسى ەكىگە ءبولىندى. ءبىر تاراپ «نەگە جىلايدى» دەپ تاڭقالىپ جاتسا، ەكىنشى تاراپ ۇستازدى قۇتتىقتاپ جاتىر.

ولاردىڭ اراسىندا «بۇل كىسى پرەزيدەنت ماراپاتىن العانىنا ەمەس، ەڭبەگىنىڭ ەلەنگەنىنە كوڭىلى بوساپ كەتتى»، «40 جىل بويى اعىلشىن تىلىنەن ساباق بەرىپ كەلەدى. ەكى قىزىن جالعىز ءوزى اسىراپ باققان اكە. دەنساۋلىعى ناشار. ەڭبەگى ەلەنگەندىكتەن جىلايدى دا»، «جاقسى كىسى ەكەنى كورىنىپ تۇر، مىڭ جاساسىن»، «ەە، ءبىزدىڭ اعاي زۆەزدا عوي»، «40 جىل بويعى ەڭبەگىنىڭ ەلەنگەنىنە قۋانىپ جىلاپ جىبەرگەن شىعار، ۇستاز بولۋ وڭاي ەمەس» دەپ جازعاندار دا بار.