پرەزيدەنت قوعامدىق تارتىپكە ۇلەس قوسقانداردى ماراپاتتادى
استانا. KAZINFORM - سۋعا باتىپ بارا جاتقان ادامدى قۇتقارامىن دەپ قىزمەت بارىسىندا ەرلىكپەن قازا تاپقان اتىراۋ قالاسىنىڭ جول-پاترۋل پوليتسياسى باتالونىنىڭ قىزمەتكەرى شالقار اقىمعاليەۆ III دارەجەلى «ايبىن» وردەنىمەن ناگرادتالعان.
ەرجۇرەك ۇلدى دۇنيەگە اكەلىپ، تاربيەلەگەن شالقاردىڭ اناسى ءلاززات مۇقانوۆاعا العىس جاريالاندى.
قىزمەتتىك بورىشىن اتقارۋ كەزىندە ەرلىكپەن قازا تاپقان استانا قالاسى توتەنشە جاعدايلار دەپارتامەنتىنىڭ ءورت ءسوندىرۋ جانە اپاتتىق قۇتقارۋ جۇمىستارى قىزمەتىنىڭ جەدەل كەزەكشىسىنىڭ كومەكشىسى اسقار زابيكۋليننىڭ جۇبايى انەل زابيكۋليناعا العىس جاريالاندى.
جول قوزعالىسى قاۋىپسىزدىگىن قامتاماسىز ەتۋ كەزىندە ەرلىك جاساپ، سونىڭ سالدارىنان ءوز بەتىمەن قوزعالۋ مۇمكىندىگىنەن ايرىلعان الماتى قالاسى پوليتسيا دەپارتامەنتىنىڭ جول پوليتسياسى باتالونى كومانديرىنىڭ ورىنباسارى ءانۋار بايتۇرسىنوۆقا دەمەۋ بولىپ، ادالدىق، تاباندىلىق تانىتقان جارى گۇلجان بايتۇرسىنوۆاعا العىس جاريالاندى.
قوعامدىق ءتارتىپتى قامتاماسىز ەتۋگە بەلسەندى اتسالىسىپ، كوپكە ۇلگى كورسەتكەنى ءۇشىن اقمولا وبلىسى اتباسار اۋدانى شۋيسكوە اۋىلىنىڭ اقساقالى ەركەباي بايجىگىتوۆكە العىس جاريالاندى.
2022 -جىلدان بەرى بىردە-ءبىر قىلمىس تىركەلمەگەن جامبىل وبلىسى شۋ اۋدانى بالۋان شولاق اۋىلىنىڭ اقساقالدار كەڭەسىنىڭ ءتوراعاسى ەسەنگەلدى تەكەبايەۆقا قوعامدىق ءتارتىپتى قامتاماسىز ەتۋگە بەلسەندى قاتىسقانى ءۇشىن العىس جاريالاندى.
جامبىل وبلىسىنداعى قۇقىقتىق ءتارتىپتى قامتاماسىز ەتىپ كەلە جاتقان پوليتسياداعى قۇرمەتتى اۋلەتتەردىڭ ءبىرى - زاينۋليندەر وتباسىنا ابىرويلى قىزمەت اتقارىپ، قوعامدىق ءتارتىپتى نىعايتۋعا ەلەۋلى ۇلەس قوسقانى ءۇشىن العىس جاريالاندى.
اۋلەتتىڭ جالپى ەڭبەك ءوتىلى - 63 جىل.
2013 -جىلدان بەرى 500 دەن اسا كۇردەلى ءىستى اشقان الماتى قالاسى پوليتسيا دەپارتامەنتىنىڭ اسا ماڭىزدى ىستەر جونىندەگى اعا تەرگەۋشىسى، پوليتسيا مايورى جاننا شەشمۋحانوۆاعا كاسىبيلىگى مەن ادالدىعى ءۇشىن العىس جاريالاندى.
ەسكە سالايىق، مەكەمەلىك ناگرادالار قىزمەت بابىندا قازا بولعان قاھارمانداردىڭ ەسىمىمەن اتالادى.