پرەزيدەنت قۇرىق پورتىندا قىتايمەن بىرلەسكەن جۇك تەرمينالىن قۇرۋدى ۇسىندى
استانا. KAZINFORM - مەملەكەت باسشىسى قاسىم-جومارت توقايەۆ تاۋەلسىزدىك سارايىنداعى «ورتالىق ازيا-قىتاي» سامميتىندە قۇرىق پورتىندا قىتايمەن بىرلەسكەن جۇك تەرمينالىن قۇرۋدى ۇسىندى.
- ترانس كاسپي باعىتىنىڭ تارتىمدىلىعىن ارتتىرۋ ءۇشىن ءبىز كاسپي تەڭىزى پورتتارىن جاڭعىرتۋ جانە سيفرلاندىرۋ، جۇك تەرمينالدارىن سالۋ، كولىك كەمەلەرىنىڭ ءوندىرىسىن جولعا قويۋ جونىندە جۇيەلى شارالار قابىلداپ جاتىرمىز. كاسپييدەگى قۇرىق پورتىندا قىتايمەن بىرلەسكەن جۇك تەرمينالىن قۇرۋ ماسەلەسىن قاراستىرۋدى ۇسىنامىز، - دەدى مەملەكەت باسشىسى.
پرەزيدەنتتىڭ سوزىنشە، قازاقستانداعى كولىك بەكەتتەرىنىڭ وتكىزۋ قۋاتىن ارتتىرۋ، لوگيستيكانىڭ ينفراقۇرىلىمدى ودان ءارى كەڭەيتۋ، زاماناۋي جۇك تاسىمالىن دامىتۋ باعىتىنداعى جوبالار قىتاي تارابى بەلسەندى قولداۋ كورسەتىپ وتىر.
- دوستىق-مويىنتى ۋچاسكەسىندە كولىك قوزعالىسىنىڭ اشىلۋى، الماتى قالاسىندا جەتىسۋ ءىرى كونتەينەرلىك تەرمينالدىڭ جانە اقتاۋ پورتىندا كونتەينەرلىك حابتىڭ قۇرىلۋى بۇل باعىتتاعى باستى جەتىستىكتەر بولدى، - دەدى قاسىم-جومارت توقايەۆ.
ايتا كەتەيىك، ەلورداداعى تاۋەلسىزدىك سارايىندا «ورتالىق ازيا - قىتاي» Ⅱ سامميتى ءوتىپ جاتىر.
ءىس-شاراعا مەملەكەت باسشىسى قاسىم-جومارت توقايەۆ، ق ح ر ءتوراعاسى شي جينپيڭ، وزبەكستان پرەزيدەنتى شاۆكات ميرزيەۆ، قىرعىزستان پرەزيدەنتى سادىر جاپاروۆ، تۇرىكمەنستان پرەزيدەنتى سەردار بەردىمۇحامەدوۆ جانە تاجىكستان پرەزيدەنتى ەمومالي راحمون قاتىسىپ وتىر.
اۆتور
ەسىمجان ناقتىباي