پرەزيدەنت: قازاقستان ءۇشىن سۋ - ۇلتتىق قاۋىپسىزدىك ماسەلەسى
استانا. KAZINFORM - مەملەكەت باسشىسى قاسىم-جومارت توقايەۆ اقوردادا سۋ شارۋاشىلىعى قىزمەتكەرلەرىن مەملەكەتتىك ناگرادالارمەن ماراپاتتاۋ راسىمىندە قازاقستان ءۇشىن سۋ - ۇلتتىق قاۋىپسىزدىك ماسەلەسى ەكەنىن اتاپ ءوتتى.
- بۇگىن - سۋ شارۋاشىلىعى قىزمەتكەرلەرىنىڭ كۇنى. الدىمەن سىزدەرگە كاسىبي مەرەكەلەرىڭىز قۇتتى بولسىن دەگىم كەلەدى. بارشاڭىزدى قۇتتىقتايمىن. سۋ - بۇكىل تىرشىلىكتىڭ كوزى. سۋسىز ءومىر جوق ەكەنىن ءبارىمىز دە بىلەمىز. سۋ - الەمدەگى بارلىق ەل ءۇشىن اسا ماڭىزى ستراتەگيالىق رەسۋرس. ءبىزدىڭ كەڭ بايتاق جەرىمىز بار. الايدا، ەل اۋماعىنىڭ جارتىسىنان كوبى ءشول جانە شولەيت جەرلەر. سوندىقتان قازاقستان ءۇشىن سۋ ماسەلەسى ۇلتتىق قاۋىپسىزدىك ماسەلەسى دەسەك، ارتىق بولمايدى، - دەدى پرەزيدەنت.
مەملەكەت باسشىسى سۋ شارۋاشىلىعى سالاسى ءاردايىم مەملەكەتتىڭ ايرىقشا نازارىندا ەكەنىن باسا ايتتى.
- 2023 -جىلى حالىققا جولداۋىمدا مەن سۋدى ءتيىمدى پايدالانۋ جايىنا ەرەكشە توقتالدىم. ەلىمىزدە سۋ رەسۋرستارى جانە يرريگاتسيا مينيسترلىگى قۇرىلدى. ناقتى مىندەتتەر ايقىندالىپ، اۋقىمدى رەفورمالار قولعا الىندى. جاڭا سۋ كودەكسى قابىلداندى. ءىرى ينفراقۇرىلىمدىق جوبالار جۇزەگە اسىرىلىپ جاتىر. سۋ نىساندارىن سالۋعا جانە قالپىنا كەلتىرۋگە قوماقتى قاراجات ءبولىندى. شەتەلدەن ينۆەستيتسيا تارتىلۋدا، - دەدى قاسىم-جومارت توقايەۆ.