پرەزيدەنت قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆانى قابىلدادى

مەملەكەت باسشىسى قاسىم-جومارت توقايەۆ قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆانى قابىلدادى، دەپ حابارلايدى Kazinform اقوردانىڭ رەسمي سايتىنا سىلتەمە جاساپ.

پرەزيدەنتكە قارجى نارىعىنداعى جاعداي، ەكونوميكانىڭ ناقتى سەكتورىنا بەرىلەتىن كرەديت كولەمىن كەڭەيتۋگە جانە حالىقتىڭ تىم كوپ نەسيە الۋىن تومەندەتۋگە باعىتتالعان شارالار تۋرالى باياندالدى.

قاسىم-جومارت توقايەۆقا بانك اكسيونەرلەرىنىڭ جاۋاپكەرشىلىگىن قاتاڭداتۋ ءۇشىن تولەم قابىلەتى تومەن بانكتەردىڭ جۇمىسىن رەتتەۋگە جانە مەملەكەتتىك قولداۋدى شەكتەۋگە قاتىستى زاڭ جوباسىنىڭ ازىرلەنىپ جاتقانى جونىندە مالىمەت بەرىلدى. مەملەكەت تاراپىنان كورسەتىلگەن قارجىلاي قولداۋدى تولىق وتەمەيىنشە، بانك باسشىلارىنا ديۆيدەندتەر مەن بونۋستار تولەۋگە زاڭ جۇزىندە تىيىم سالاتىن وزگەرىس ەنگىزۋ جوسپارلانىپ وتىر.

اگەنتتىك ءتوراعاسى بانك سەكتورىندا تۇراقتىلىق جانە بارلىق قارجى كورسەتكىشتەرىندە ءوسىم بايقالاتىنى تۋرالى ايتتى. جىل باسىنان بەرى بانكتەردىڭ اكتيۆتەرى 4,8 پايىزعا، ياعني 46,7 تريلليون تەڭگەگە دەيىن ءوستى. ەكونوميكانى كرەديتتەۋ 11,5 پايىزعا نەمەسە 25,4 تريلليون تەڭگەگە دەيىن، سونىڭ ىشىندە شاعىن جانە ورتا بيزنەسكە بەرىلگەن كرەديتتەر 9,0 پايىزعا نەمەسە 6,6 تريلليون تەڭگەگە دەيىن ۇلعايدى.

پرەزيدەنتتىڭ بيزنەستى كرەديتتەۋدى ىنتالاندىرۋ جونىندەگى تاپسىرماسىن جۇزەگە اسىرۋ ماقساتىندا بانكتەردىڭ كاپيتالىنا، وتىمدىلىگى مەن كەپىل ساياساتىنا، سونداي-اق شەتەلدىك ەنشىلەس بانكتەردىڭ كرەديتتىك بەلسەندىلىگىن ارتتىرۋعا قاتىستى جاڭا پرۋدەنتسيالدى شارالار ازىرلەندى. شەتەلدىك ينۆەستورلار ەلىمىزدىڭ بانك سەكتورىنا كىرۋى ءۇشىن تالاپتاردى وڭتايلاندىرۋ جوسپارلانىپ وتىر.

اگەنتتىك سيفرلىق پلاتفورمالار ارقىلى سترەسستى اكتيۆتەردى ساتۋ، حالىقتىڭ تىم كوپ نەسيە الۋىن تومەندەتۋ، بارلىق ميكروكرەديت بويىنشا ءبىرىڭعاي مولشەرلەمە بەلگىلەۋ، كوللەكتورلىق قىزمەتكە قويىلاتىن تالاپتاردى قاتاڭداتۋ، قارجىلىق الاياقتىققا قارسى ءىس-قيمىل جونىندەگى زاڭ جوبالارىن ازىرلەپ، پارلامەنتتىڭ قاراۋىنا ەنگىزدى.

مەملەكەت باسشىسىنا قاداعالاۋ قىزمەتى اياسىندا جۇرگىزىلگەن تەكسەرۋلەردەن كەيىن 29 ميكروقارجى ۇيىمىنىڭ جانە 14 كوللەكتورلىق اگەنتتىكتىڭ قىزمەتى توقتاتىلعانى، ولارعا 90 قاداعالاۋ شاراسى قولدانىلىپ، جالپى سوماسى 105,3 ميلليون تەڭگە بولاتىن 338 ايىپپۇل سالىنعانى جونىندە باياندالدى.

كەزدەسۋ سوڭىندا مەملەكەت باسشىسى اگەنتتىككە قارجى تۇراقتىلىعىن ساقتاۋ، حالىقتىڭ تىم كوپ نەسيە الۋىن تومەندەتۋ جانە قارجىلىق قىزمەت تۇتىنۋشىلارىن قورعاۋدى كۇشەيتۋ، بيزنەس سۋبەكتىلەرىن كرەديتتەۋ ءىسىن ىنتالاندىرۋ جونىندە ءبىرقاتار مىندەت جۇكتەدى.