پرەزيدەنت قاراۋىنا ۇ ق ش ۇ مۇشە ەلدەر كەلىسىمىنە وزگەرىستەر ەنگىزۋ ۇسىنىلادى

استانا. KAZINFORM - قازاقستان رەسپۋبليكاسى پرەزيدەنتى قاسىم-جومارت توقايەۆتىڭ قاراۋىنا ۇجىمدىق قاۋىپسىزدىك تۋرالى شارت ۇيىمىنا مۇشە مەملەكەتتەردىڭ ىنتىماقتاستىعى تۋرالى كەلىسىم (2015 -جىلعى 15-قىركۇيەكتەگى) اياسىندا اسكەري جانە باسقا دا قۇرالىمداردى، ولاردىڭ جىلجىمالى مۇلكىن، سونداي-اق اسكەري ماقساتتاعى ءونىمدى تاسىمالداۋ سالاسىنا وزگەرىستەر ەنگىزۋ ۇسىنىلادى.

قۇجات جوباسى «اشىق ن ق ا» سايتىندا جاريالاندى.

«اسكەري جانە باسقا دا قۇرالىمدار» دەگەن سوزدەردەن كەيىن «قۇرالىمدار قولباسشىلىعىنا تاعايىندالعان جەكە قۇرام» دەگەن سوزدەرمەن تولىقتىرىلسىن. «ۇلتتىق ۇلان» دەگەن سوزدەردەن كەيىن «پوليتسيا اسكەرى» دەگەن سوزدەرمەن تولىقتىرىلسىن. وتكىزۋ پۋنكتتەرىندە «مەملەكەتتىك شەكارانى كەسىپ ءوتۋدى» دەگەن سوزدەر «وتكىزۋ پۋنكتتەرىندە مەملەكەتتىك شەكارانى كەسىپ ءوتۋ قاعيدالارىن ساقتاۋدى باقىلاۋدى جۇزەگە اسىرۋعا قارۋ- جاراقتى، اسكەري تەحنيكا مەن اسكەري- تەحنيكالىق مۇلىكتى ترانزيتتەۋگە رۇقسات بەرۋگە» دەگەن سوزدەرمەن اۋىستىرىلسىن»، - دەلىنگەن جوبادا.

سونداي-اق، توتەنشە جاعدايلار سالدارىن جويۋدىڭ قاسىنا گۋمانيتارلىق كومەك كورسەتۋ دەگەن تىركەستى ەنگىزۋ ۇسىنىلىپ وتىر.

سونىمەن قاتار قۇجاتتا ايتىلعانداي، تاسىمالداۋ، ترانزيتتەۋ تاراپتاردىڭ ۋاكىلەتتى ورگاندارى الدىن الا كەلىسكەننەن جانە جوسپارلاعاننان كەيىن عانا جۇزەگە اسىرىلادى. قارۋ-جاراقتى، اسكەري تەحنيكا مەن اسكەري-تەحنيكالىق مۇلىكتى ترانزيتتەۋ تاراپتاردىڭ قۇزىرەتتى ورگانىنىڭ ءتيىستى رۇقساتىمەن جۇزەگە اسىرىلادى.

تاراپتار دەپوزيتاريدى وسى كەلىسىمنىڭ كۇشىنە ەنۋى ءۇشىن قاجەتتى مەملەكەت ىشىلىك راسىمدەردىڭ ورىنداعانى تۋرالى حابارلاۋمەن ءبىر ۋاقىتتا ۋاكىلەتتى جانە قۇزىرەتتى ورگانداردى تاعايىنداۋ تۋرالى حاباردار ەتەدى. دەپوزيتاري تاراپتاردىڭ ۋاكىلەتتى جانە قۇزىرەتتى ورگاندارىنىڭ تىزبەسىن تاراپتارعا جىبەرەدى. قۇزىرەتتى ورگان وزگەرگەن جاعدايدا 30 كۇن مەرزىمدە ديپلوماتيالىق ارنا ارقىلى دەپوزيتارييدى حاباردار ەتەدى، ول بەلگىلەنگەن تارتىپپەن بۇل تۋرالى باسقا تاراپتاردى حاباردار ەتەدى.

«كەلىسىمگە قاتىسۋشى ەمەس مەملەكەتتەردىڭ اۋماعى بويىنشا ترانزيتتەۋ قابىلداۋشى تاراپ جانە جىبەرۋشى تاراپ نەمەسە ۇ ق ش ۇ- عا مەملەكەتتەرمەن جاساعان ءتيىستى شارتتاردا كوزدەلگەن تارتىپپەن جۇزەگە اسىرىلادى. تاراپتار بۇل ءۇشىن قاجەتتى نورماتيۆتىك قۇقىقتىق بازانى قالىپتاستىرۋ ءۇشىن كۇش- جىگەر جۇمسايدى»، - دەپ جازىلعان حاتتامادا.

ودان بولەك، تاسىمالداۋدى جۇزەگە اسىرۋ كەزىندە اپات بولعان جاعدايدا جابىرلەنۋشى تاراپقا قاجەت بولعان كەزدە وقيعانىڭ سالدارىن جويۋ جۇمىسىن جۇزەگە اسىرۋ ءۇشىن ءتيىستى اقپاراتتى، كۇشتەر مەن قۇرالداردى دەرەۋ بەرىپ، سالدارىن ۋاقتىلى جويۋ جانە ولاردىڭ سەبەپتەرىن تەرگەپ-تەكسەرۋ شارالارىن قابىلدايدى. بۇل رەتتە ىزدەۋ- قۇتقارۋ ءىس- شارالارىن تاراپتاردىڭ تاعايىندالعان كۇشتەرى مەن قۇرالدارى وتەۋسىز نەگىزدە ۇيىمداستىرادى.

قۇجات جوباسى 2024 -جىلعى 5-قاراشاعا دەيىن قوعامدىق تالقىلاۋعا ۇسىنىلىپ وتىر.

ەسكە سالا كەتسەك، بيىل ماۋسىمدا مەملەكەت باسشىسى قاسىم-جومارت توقايەۆ ۇ ق ش ۇ- عا مۇشە ەلدەر پارلامەنتتەرى پالاتالارىنىڭ سپيكەرلەرىمەن كەزدەستى.

مەملەكەت باسشىسى زاڭ شىعارۋ ورگاندارىنىڭ سپيكەرلەرىنە ءىلتيپات بىلدىرە وتىرىپ، رەسەيدىڭ ۇ ق ش ۇ پارلامەنتتىك اسسامبلەياسىنا تۇراقتى مارتەبە بەرۋ تۋرالى ۇسىنىسىن قولدايتىنىن ايتتى. پرەزيدەنت باسقا ەلدەردىڭ دەلەگاتسيالارىن وسى باستامانى قولداۋعا شاقىردى.

اۆتور

داۋلەت ىزتىلەۋ