پرەزيدەنت Polpharma كومپانياسى باقىلاۋشىلار كەڭەسىنىڭ ءتوراعاسى ەجي ستاراكپەن كەزدەستى
استانا. KAZINFORM - شەتەلدىك ينۆەستورلار كەڭەسىنىڭ وتىرىسى اياسىندا پرەزيدەنت قاسىم-جومارت توقايەۆ Polpharma كومپانياسى باقىلاۋشىلار كەڭەسىنىڭ ءتوراعاسى ەجي ستاراكتى قابىلدادى. دەپ حابارلايدى اقوردانىڭ باسپا ءسوز قىزمەتى.
كەزدەسۋدە الەمدەگى جەتەكشى فارماتسيەۆتيكالىق كومپانيانىڭ قازاقستان مەن ورتالىق ازياداعى قىزمەتىن كەڭەيتۋ ماسەلەلەرى تالقىلاندى.
مەملەكەت باسشىسىنا كومپانيانىڭ ساپانى باقىلاۋ زەرتحاناسى مەن عىلىمي-زەرتتەۋ سىناق ورتالىعىنىڭ قۇرىلىسى اياقتالعانى جونىندە مالىمەت بەرىلدى. سونداي-اق تاياۋ ارادا جاڭا دارىلىك پرەپاراتتار ءوندىرىسىن ىسكە قوسۋ جوسپارى تانىستىرىلدى.
قاسىم-جومارت توقايەۆ قازاقستاننىڭ فارماتسيەۆتيكا يندۋسترياسىنداعى عىلىمي-زەرتتەۋ الەۋەتىن دامىتۋ جانە وقۋ باعدارلامالارىن ەنگىزۋ ماڭىزدى ەكەنىن اتاپ ءوتتى. مەملەكەت باسشىسى كوكتەمگى سۋ تاسقىنى كەزىندە زارداپ شەككەن وڭىرلەرگە قاجەتتى ءدارى-دارمەكتەردى جەدەل جەتكىزىپ بەرگەنى ءۇشىن پولشالىق ينۆەستورعا العىس ايتتى.
كەزدەسۋ سوڭىندا ەجي ستاراك قاسىم-جومارت توقايەۆقا ەكى كىتاپ سىيعا تارتتى. ونىڭ ءبىرىنشىسى Polpharma كومپانياسىنىڭ دەمەۋشىلىگىمەن ءتۇسىرىلىپ جاتقان دەرەكتى فيلمگە ارنالعان. بۇل فيلمدە بەكەت اتا، قوجا احمەت ياساۋي، ارىستان باب كەسەنەلەرى، تامعالى پەتروگليفتەرى مەن بوتاي قونىسى سەكىلدى قازاقستاننىڭ كيەلى جەرلەرى تاسپالانعان.
ەكىنشى كىتاپ - قازاقتىڭ بەلگىلى جازۋشىسى، پولشانى باسقىنشىلاردان ازات ەتۋگە قاتىسقان مايدانگەر كەمەل توقايەۆ تۋرالى عۇمىرباياندىق جيناق. بۇل باسىلىم پولشا-قازاقستان تاريحى كوميسسياسىنىڭ قولداۋىمەن ازىرلەندى.
وسىعان دەيىن قاسىم-جومارت توقايەۆ Solidcore Resources plc كومپانياسىنىڭ باس اتقارۋشى ديرەكتورى ۆيتالي نەسيستى قابىلدادى.