پرەزيدەنت: مەملەكەتكە قىزمەت ەتۋ - ەڭ قۇرمەتتى ءارى اسا جاۋاپتى مىندەت
استانا. KAZINFORM - مەملەكەت باسشىسى قاسىم-جومارت توقايەۆ قۇقىق قورعاۋ ورگاندارىنىڭ كەڭەيتىلگەن القا ماجىلىسىندە ءسوز سويلەدى.
- بۇگىن ەلىمىزدە - پوليتسيا كۇنى جانە مەملەكەتتىك قىزمەتشى كۇنى اتالىپ وتۋدە. سوندىقتان، الدىمەن، ەلىمىزدەگى پوليتسيا قىزمەتكەرلەرى مەن مەملەكەتتىك قىزمەتشىلەردى كاسىبي مەيرامدارىمەن قۇتتىقتايمىن.
مەملەكەتكە قىزمەت ەتۋ - ەڭ قۇرمەتتى ءارى اسا جاۋاپتى مىندەت. سىزدەر زاڭ مەن ءتارتىپتى ساقتاۋعا جانە ازاماتتاردىڭ قۇقىعىن قورعاۋعا زور ۇلەس قوسىپ جۇرسىزدەر.
قازىر دۇنيە ءجۇزى الماعايىپ، بۇلىڭعىر، ياعني، وتە كۇردەلى كەزەڭدى باستان وتكەرۋدە. وسىنداي قۇبىلمالى ۋاقىتتا قوعامدىق قاۋىپسىزدىكتى ساقتاۋ، زاڭنىڭ مۇلتىكسىز ورىندالۋىن قامتاماسىز ەتۋ - ايرىقشا ماڭىزدى مىندەت.
سول سەبەپتى، بۇگىن ءبىز العاش رەت وسىنداي قۇراممەن جينالىپ وتىرمىز. قۇقىق قورعاۋ جۇيەسىندەگى بارلىق جاۋاپتى قۇرىلىمدار جۇمىلا جۇمىس ىستەۋى قاجەت، - دەدى پرەزيدەنت.
قاسىم-جومارت توقايەۆتىڭ پايىمىنشا، ەلىمىزدە «زاڭ مەن ءتارتىپتىڭ» قاتاڭ ساقتالۋىنا قوعام وكىلدەرىنىڭ قوسار ۇلەسى دە وراسان زور.
- قازىر وسى جيىنعا ورتالىق جانە جەرگىلىكتى اتقارۋشى ورگان باسشىلارى، دەپۋتاتتار، ساراپشىلار جانە بەلسەندى ازاماتتار قاتىسىپ وتىر.
كۇشتىك قۇرىلىمداردى جاڭعىرتۋ ىسىندە جاڭا بۋىننىڭ اتقاراتىن ءرولى ەرەكشە. سول سەبەپتى، بۇگىنگى باسقوسۋعا اكادەميالاردىڭ كۋرسانتتارى دا ارنايى شاقىرىلدى.
ترانسۇلتتىق قىلمىستىق توپتارمەن كۇرەسۋ ءۇشىن حالىقارالىق ىنتىماقتاستىقتى دامىتۋ وتە ماڭىزدى. وسى جەردە بۇگىن شەتەلدىك پوليتسيا اتتاشەلەرى وتىر. قۇقىق قورعاۋ ورگاندارىمەن جۇرگىزىپ جاتقان حالىقارالىق ىنتىماقتاستىق جۇمىسى ءۇشىن سىزدەرگە ەرەكشە ريزاشىلىعىمدى بىلدىرەمىن، - دەپ مالىمدەدى مەملەكەت باسشىسى.
ول سوڭعى جىلدارى ەلىمىزدە بارلىق سالادا اۋقىمدى رەفورمالار جاسالىپ جاتقانىن اتاپ ءوتتى. مەملەكەتتىڭ ساياسي جۇيەسى مەن ەكونوميكالىق قۇرىلىمى تۇبەگەيلى جاڭعىرۋدا. ەل ىشىندە جوعارى قۇقىقتىق مادەنيەت قالىپتاسىپ كەلەدى. ازاماتتىق جاۋاپكەرشىلىك يدەولوگياسى بەرىك ورنىعا باستادى. بۇل - ءبىزدىڭ ستراتەگيالىق باعدارىمىزعا ءتان اسا ماڭىزدى باسىمدىق.
- مەملەكەت قۇقىق قورعاۋ جۇيەسىن جەتىلدىرۋگە جانە بارلىق سالادا زاڭ مەن ءتارتىپ ورناتۋعا باسا ءمان بەرەدى. وسى باعىتتا ناقتى ناتيجەگە قول جەتكىزدىك.
2019 -جىلدان بەرى قىلمىستىق قۇقىقبۇزۋشىلىق سانى شامامەن ەكى ەسە ازايدى. سونىڭ ىشىندە قاراقشىلىق، توناۋ، ۇرلىق پەن بۇزاقىلىق دەڭگەيى 4 ەسە تومەندەدى، ال كىسى ولتىرۋگە قاتىستى قىلمىستار 30 پايىزعا كەمىدى. قوعامدىق ورىندارداعى قىلمىس سانى 80 پايىزعا ازايدى. بۇل - ازاماتتارىمىز كوشەدە ەشتەڭەدەن قاۋىپتەنبەي، الاڭسىز جۇرە الادى دەگەن ءسوز، - دەدى پرەزيدەنت.