پرەزيدەنت مەديتسينا تاريحىندا تۇڭعىش رەت جاسالعان وتا ءۇشىن حيرۋرگتەرگە العىس ايتتى
استانا. KAZINFORM - مەملەكەت باسشىسى قاسىم-جومارت توقايەۆ ا. ن. سىزعانوۆ اتىنداعى ۇلتتىق عىلىمي حيرۋرگيا ورتالىعىنا قۇتتىقتاۋ جولدادى. بۇل تۋرالى اقوردا ءمالىم ەتتى.
جۋىردا ا. ن. سىزعانوۆ اتىنداعى ۇلتتىق عىلىمي حيرۋرگيا ورتالىعى ەلىمىزدىڭ مەديتسينا تاريحىندا تۇڭعىش رەت ءبىر مەزەتتە ءۇش ناۋقاسقا ءۇش دونوردىڭ بۇيرەگىن توعىسپالى ترانسپلانتاتسيا تاسىلىمەن سالاتىن اسا كۇردەلى وپەراتسيانى ءساتتى وتكىزدى. پرەزيدەنت بەلگىلى حيرۋرگ، پروفەسسور بولاتبەك بايماحانوۆتىڭ جەتەكشىلىگىمەن جاسالعان بۇل وپەراتسيانى وتاندىق مەديتسينانىڭ زور جەتىستىگى رەتىندە باعالاپ، ورتالىق ۇجىمىنا العىس حات جولدادى.
- مەملەكەت دەنساۋلىق ساقتاۋ سالاسىن دامىتۋعا باسا ءمان بەرەدى. بۇل رەتتە كوپتەگەن ىرگەلى باستاما قولعا الىنىپ، اۋقىمدى جۇمىس اتقارىلىپ جاتىر. سونىڭ ناتيجەسىندە ۇلتتىق مەديتسينا قارقىندى دامىپ كەلەدى. سىزدەر جاساعان بىرەگەي وپەراتسيا - سونىڭ ايقىن دالەلى. ءقازىر ەلىمىز وتە كۇردەلى ترانسپلانتاتسيالىق وپەراتسيا جاسايتىن الەمدەگى التى مەملەكەتتىڭ قاتارىنا كىرەدى. بۇل جەتىستىككە وتاندىق مامانداردىڭ، سونىڭ ىشىندە وزدەرىڭىزدىڭ قاجىرلى ەڭبەكتەرىڭىز بەن ەرەكشە بىلىمدەرىڭىزدىڭ، سونداي-اق تەڭدەسسىز تاجىريبەلەرىڭىزدىڭ ارقاسىندا جەتىپ وتىرمىز. بارشاڭىزعا شىنايى ريزاشىلىعىمدى بىلدىرەمىن. بولاشاقتا دا ۇلت ساۋلىعىن جاقسارتۋ ءۇشىن تىنىمسىز تەر توگىپ، حالقىمىزعا قالتقىسىز قىزمەت ەتە بەرەسىزدەر دەپ سەنەمىن، - دەلىنگەن العىس حاتتا.
ەسكە سالا كەتەيىك، بۇعان دەيىن وتاندىق مەديتسينا تاريحىندا تۇڭعىش ا. ن. سىزعانوۆ اتىنداعى ۇلتتىق عىلىمي حيرۋرگيا ورتالىعى بازاسىندا پروفەسسور بولاتبەك بايماحانوۆتىڭ جەتەكشىلىگىمەن ترانسپلانتولوگ دارىگەرلەر كومانداسى بۇيرەكتى ۇشتىك ايقاس ترانسپلانتاتسيا جاساعانىن جازعان بولاتىنبىز.
اقپاراتتا ايتىلعانداي، قازاقستان بۇيرەك ترانسپلانتاتسياسى بويىنشا جوعارى تەحنولوگيالىق ارالاسۋ جۇرگىزىلىپ جاتقان الەمنىڭ التى ەلىنىڭ قاتارىنا كىرگەن ەدى.