پرەزيدەنت ماڭعىستاۋ وبلىسىنىڭ اكىمى نۇرداۋلەت قيلىبايدى قابىلدادى

استانا. KAZINFORM - كەزدەسۋ بارىسىندا قاسىم-جومارت توقايەۆ ايماقتىڭ جاڭا باسشىسىنا ماڭىزدى مىندەتتەر جۇكتەدى.

اتاپ ايتقاندا، ءوڭىر ەكونوميكاسىن ءارتاراپتاندىرۋ، سونىڭ ىشىندە جاڭا ءوندىرىس ورىندارىن اشۋ جانە دامۋدىڭ تىڭ باعىتتارىن قولعا الۋ كەرەك ەكەنىنە نازار اۋداردى.

سونداي- اق تۋريزم، قۇرىلىس، كولىك-لوگيستيكا سالالارىن وركەندەتۋگە ايرىقشا ءمان بەرىلۋگە ءتيىس.

مەملەكەت باسشىسى كوممۋنالدىق ينفراقۇرىلىمدى جاڭعىرتۋ ءۇشىن كەشەندى شارالار قابىلداۋ ماڭىزدى ەكەنىن اتاپ ءوتتى.

وبلىس اكىمىنە اقتاۋ قالاسى مەن ونىڭ توڭىرەگىندەگى ەلدى مەكەندەردى جىلۋمەن، اۋىزسۋمەن قامتاماسىز ەتىپ وتىرعان م ا ە ك جانە «كاسپي جىلۋ، سۋ ارناسى» كاسىپورىندارىنىڭ بالانسىنداعى ينفراقۇرىلىمدى جوندەۋ، جاڭعىرتۋ جۇمىستارىن جەدەلدەتۋ تاپسىرىلدى.

سونداي- اق وڭىردەگى سۋ تاپشىلىعىن جويۋ ءۇشىن «كاسپي» سۋ تۇشىتۋ زاۋىتىنىڭ قۋاتىن ارتتىرىپ، جەكە ينۆەستيتسيالار ەسەبىنەن قوسىمشا سۋمەن قامتاماسىز ەتۋ نىساندارىن ىسكە قوسۋ قاجەت.

ەسكە سالا كەتەيىك، نۇرداۋلەت قيلىباي وتكەن اپتادا عانا ماڭعىستاۋ وبلىسىنىڭ اكىمى بولىپ تاعايىندالعان ەدى.