پرەزيدەنت ۇلتتىق مۋزەيدەگى ونەر تۋىندىلارى كورمەسىن تاماشالادى
استانا. KAZINFORM - مەملەكەت باسشىسى قاسىم-جومارت توقايەۆ ەلورداداعى ۇلتتىق مۋزەيگە ارنايى بارىپ، وتاندىق جانە الەمدىك بەينەلەۋ ونەرى تۋىندىلارىنىڭ كورمەسىمەن تانىستى.
بۇل تۋرالى اقوردانىڭ باسپا ءسوز قىزمەتى حابارلادى.
پرەزيدەنتكە ونەرتانۋشى ولگا باتۋرينا قازاقستاندىق تالانتتى قىلقالام شەبەرلەرىنىڭ تۋىندىلارى جيناقتالعان «دالا كەسكىندەمەسى: رامىزدەر، بوياۋلار، بەينەلەر» اتتى كورمەنى تانىستىردى. قاسىم- ومارت توقايەۆقا ايگىلى يتاليالىق سۋرەتشى لەوناردو داۆينچيدىڭ «ادەمى حانشايىم» (La bella principessa) كارتيناسىنىڭ ءتۇپنۇسقاسى كورسەتىلدى.
تانىمال تۋىندىنىڭ كورمەسى ۇلتتىق مۋزەيدىڭ 10 جىلدىعىنا وراي يتاليانىڭ «Scripta Maneant» باسپاسىمەن بىرلەسە ۇيىمداستىرىلعان. جوعارى رەنەسسانس داۋىرىنە جاتاتىن بۇل قۇندى جادىگەر ەۋروپادان تىسقارى جەرگە العاش رەت شىعارىلىپ وتىر. كورمە ەلىمىزدىڭ مادەنيەت جانە اقپارات مينيسترلىگىنىڭ، يتاليانىڭ قازاقستانداعى ەلشىلىگىنىڭ جانە يتاليا مادەنيەت ينستيتۋتىنىڭ قولداۋىمەن ءوتىپ جاتىر. ەلوردا تۇرعىندارى مەن قوناقتارى لەوناردو داۆينچيدىڭ وسىناۋ بىرەگەي تۋىندىسىن 4-تامىزعا دەيىن تاماشالاي الادى.
اۆتور
ەلميرا ورالبايەۆا